پاکستان: د ایران او امریکا ترمنځ منځګړیتوب ته ژمن یو

د پاکستان د کورنیو چارو وزیر محسن نقوي ویلي، اسلام‌اباد د ایران او امریکا ترمنځ د منځګړیتوب او د کړکېچ د کمولو لپاره خپلو هڅو ته دوام ورکوي.

نقوي یو ځل بیا ټینګار کړی، چې پاکستان د دواړو هېوادونو ترمنځ د شخړې پر مهال له سختو شرایطو سره سره، ډیپلوماټیکو هڅو ته دوام ورکړی او د کړکېچ د لا پراخېدو د مخنیوي لپاره یې ټولې ممکنې لارې کارولې دي.

هغه زیاته کړې، چې پاکستان له تقابل سره د مخامخ کېدو پر ځای ډیپلوماسۍ ته لومړیتوب ورکوي.

د پاکستان د کورنیو چارو وزیر ویلي، تېرې میاشتې د سیمې لپاره ډېرې سختې وې او د ایران او امریکا ترمنځ شخړې نه یوازې منځني ختیځ، بلکې ټولې نړۍ ته جدي خطرونه رامنځته کړي وو.