د پاکستان ایټمی وسله یوازې دځان د دفاع لپاره ده
د پاکستان د بهرنیو چارو وزارت وویل د اسلام اباد ایټمی وسله د هیڅ هیواد په خلاف نه ده.
د پاکستان د خارجه وزارت مرستیال نن په اسلام اباد کې د اسیا د جنوب په سیمه کې د ایټمی امنیت په نامه په یو سیمینار کې وویل چې ددغه هیواد ایټمی وسله د هیڅ هیواد په خلاف نه ده او یوازې د پاکستان لپاره یو دفاعی ډال ګڼل کیږی.
زمونږ د خبریال د راپور له مخې اعزاز احمد چودری زیاته کړه د پاکستان ایټمی وسلې په پوره امنه فضا کې ساتل کیږی او د ترهه ګرو لاس به هیڅ کله د پاکستان ایټمی مرکزونو ته ونه رسیږی.
هغه له این ایس جی یعنی د ایټمی موادو له تامینوونکې ډلې سره د یو ځای کیدو لپاره له هنده د امریکا ملاتړ ته په اشارې سره وویل که هند د دغه ډلې غړی شی نو په سیمه کې به د ایټمی وسلو د سیالیو د پیل کیدو مخ نیوی ناممکن شی.
هند او پاکستان د جنوبی آسیا یوازینی ایټم بم لرونکی هیوادونه دی چې این پی ټی معاهده یې نه ده لاسلیک کړی او هیڅ ژمنتیا ورته نه لری.