په پاکستان کښې د افغان کډوالو د استوګنې موده بیا وغزیده

اسلام آباد په پاکستان کښې د افغان کډوالو د پاتې کیدو موده نوره هم وغزوله.

زمونږ خبریال وائی دا پریکړه نن سهار په اسلام آباد کښې د پاکستان د وزیراعظم نواز شریف په مشرۍ د هغه د کابینې په غونډه کښې وشوه.

د دې پریکړې له مخې افغان کډوال د ۲۰۱۷ کال د مارچ تر ۳۱ نیټې په پاکستان کښې اوسیدی شی.

یاده دې وی چې په پاکستان کښې د ترهګرو بریدونو له زیاتیدو وروسته د اسلام آباد حکومت د افغان کډوالو ستنول پخپل وړومبیتوب کښې راوستی دی.

نن سبا کابو درې میلیونه (دیرش لکه) افغان کډوال د پاکستان په مختلفو سیمو کښې اوسیږی چې نیمائی کسان یې د استوګنې یا اقامت مدارک نه لری.