شمالی وزیرستان کې طالبان یو ځل بیا منظم کېږی'
زمونږخبریال وایی د پاکستان د خیبر پښتونخوا په صوبایی اسمبلۍ کې د شمالی وزیرستان وکیل «میر قلم وزیر » ویلی، په سیمه کې د وسله والو طالبانو ډلې یوځل بیا منظمې شوې دی او فعالیتونه یې پیل کړی دی، خو د نوموړی په وینا،امنیتی ځواکونو دوسلوالو پر منظم کېدو سترګې پټې کړې دی.
د نوموړی ترڅنګ یو شمېر ځایی حکومتی چارواکو رسینو ته ویلی چې د حافظ ګل بهادر په مشرۍ د طالبانو ډله بیا په سیمه کې منظمه کېږی.
په دې وروستیو کې د خیبر پښتونخوا په شمالی وزیرستان کې د هدفی وژنو پېښې ډېرې شوې او په دې پېښو کې امنیتی کسانو ته هم مرګژوبله اوښتی ده، شپږ کسان یې وژل شوی او ۱۰ تنه یې ټپیان شوی دی.
د پخوا په څېر وسلوالې ډلې د دغو بریدونو د مسئولیت منلو لپاره له یوه بله مخکې کېږی او امنیتی سرتېری پر کومه مشخصه ډله د تور لګولو پر ځای د دغه ډول برید ګرو لپاره د ناپېژاندو وسلوالو دودیزه اصطلاح کاروی.
میر قلم وزیر وویل که امنیتی ځواکونه د وسلوالو مخه ونه نیسی ، نو په وینا یې د شمالی وزیرستان ولس به پاڅونونو ته اړ شی.
چارواکی وایی، دغه وسلواله ډله د پخوا په څېر مرکزونه نه لری، خو په وینا یې کوم وسلوال چې د کومې سیمې اوسېدونکی دی، له هماغه ځایه فعالیت کوی.
د ځایی چارواکو د شمېرو له مخې نژدې درې زره (3000)طالبان شمالی وزیرستان ته رسېدلی او د منظم کېدو هڅی کوی.
هغه زیاتوی، ''دا یوازې د شمالی وزیرستان د خلکو اندېښنه نه ده بلکې د ټولو پښتنو وېره ده چی یو ځل بیا په منظم توګه د پښتنو خاورې ته ترهګری رواستل کېږی.''
