د حسیني تاسوعا په مناسبت زموږ تسلیت ومنئ
نن شنبه د ۱۴۴۷ هجري قمري کال د محرم د میاشتې ۹مه، چې د ۲۰۲۵ میلادي کال د جولای د میاشتې له ۵مې نېټې سره سمون لري، د حسیني تاسوعا ورځ ده چې له دې یوه ورځ وورسته، حضرت ابا عبدالله الحسین (ع) او د هغه وفادار ملګري د ۶۱ هجري قمري کال د محرم په لسمه په کربلا کې په شهادت رسېږي.
ټول اسلامي ایران د حسیني تاسوعا په ورځ، په تورو ټوټو پوښل شوی او په ویر او ماتم کې ډوب دی.
د کربلا په پېښه کې امام حسین (ع) په واضحه توګه ټینګار وکړ: هدف یې د اسلام ضد حکومت ذلیل کول او نیکیو ته امر او له بدیو منع کول او د ظلم او استبداد پر وړاندې درېدل دي.
حسیني ماتم کوونکي په ټول اسلامي ایران کې د تاسوعا او حسیني عاشورا په شپو او ورځو کې د ویر او ماتم په مراسمو سره، د نړۍ د اهل تشیع د درېیم امام، حضرت امام حسین(ع) او د هغه د وفادارو ملګرو په ګډون، د هغه امام د ورور حضرت ابوالفضل العباس(ع) د شهادت کلیزه په شاندارو مراسمو سره نمانځي.
د نړۍ د اهل تشیع څلورم امام، امام سجاد (ع) د حضرت ابوالفضل العباس (ع) د مقام په بیانولو سره فرمایي: زما تره عباس په حقیقت کې ایثار او سرښندنه او خپل ژوند یې د خپل ورور لپاره قربان کړ، تر دې چې لاسونه یې پرې شول.
د کربلا له دردوونکې پېښې او د امام حسین (ع) او د هغه د وفادارو ملګرو له شهادت څخه د پېړیو په تېریدو سره، نه یوازې د دغې پېښې اهمیت او ارزښت نه دی کم شوی، بلکې د وخت په تېرېدو سره، د عاشورا پیغام پراخېږي او د ماتم مراسم په ډېري ليوالتیا او درک سره ترسره کېږي.
د امام حسین (ع) د غورځنګ، د ټولو مخلوقاتو، انسانیت او نړۍ د تاریخ او جغرافیې په کچه، درسونه لري او هېڅکله د محدود کېدو وړ نه دی.
د اسلامي ایران مؤمنو خلکو او د اهل بیت علیهم السلام مینوالو د محرم په تېره بیا د حسیني عاشورا په شپو او ورځو کې، په جوماتونو، حسینیه وو، د ایران په شمال ختیځ مشهد ښار کې د نړۍ د اهل تشیع د آتم امام، حضرت امام رضا علیه السلام په حرم او په قم ښار کې، د حضرت معصومې (س) حرم ته په ورتلو سره، د حسیني عاشورا او تاسوعا د ماتم مراسم ترسره کوي.
د تهران پښتو راډیو ټول کارکوونکي د حسیني تاسوعا د رارسېدو په مناسبت، د نړۍ ټولو مسلمانانو په تېره بیا اهل تشیع او د نړۍ نورو آزادي غوښتونکو ته، خپل د تسلیت مراتب وړاندې کوي.
