کرزی: پاکستان دې د خپل خیر لپاره پر افغانستان بریدونه بند کړي

د افغانستان پخواني ولسمشر حامد کرزي پر افغان خاوره د پاکستان هوايي بریدونه غندلي او د یادو بریدونو د بندېدو غوښتنه یې کړې ده.

نوموړي نن شنبه، پر خپله اېکسپاڼه لیکلي چې پاکستان دې د خپل خیر لپاره پر افغانستان او پر افغانانو خپل بریدونه ودروي.

هغه لیکلي: « پر پکتیکا د پاکستان هوایي بریدونه چې زموږ یوشمېر هېوادوال یې، د کرېکټ ځوانو لوبغاړو په شمول شهیدان او ټپیان کړل، په کلکو ټکو غندي. د دغو بريدونو له امله د شهیدانو کورنیو ته خپل د غمشریکۍ او ډاډګیرنې مراتب وړاندې کوي او ټپیانو ته د عاجلې روغتیا دعا کوي.»

کرزي یو ځل بیا پر پاکستان غږ کړی چې د افغانستان پر وړاندې خپلو پالیسیو کې بدلون راولي او په وینا یې، له سره دې پرې غور وکړي.

نوموړي زیاته کړې چې دغه هېواد باید له افغانستان سره د نړیوالو اصولو پربنسټ، د دوستانه او متمدنانه اړیکو لاره خپله کړي.

پاکستان تېره شپه د پکتیکا په ارګون ولسوالۍ کې پر ملکي وګړو د ډرون برید کړی چې له امله یې، ۱۲ کسان ووژل شول او ۱۳ نور ټپیان شوي دي.

په وژل شویو کې د کرکټ سیمه‌ییز لوبغاړي او ملکیان شامل دي او ټپیانو کې هم ښځي او ماشومان شته دي.