د خوزستان ولایت؛ د ګلانو او د خرما ټاټوبې

پارس تودی- د خوزستان ولایت د کرهڼیزو وړتیاو او ظرفیتونو له مخې، په ایران کې بې سارې او د نړۍ له غوره کرهڼیزو سیمو څخه دی.

د خوزستان ولایت د څلور شپېتو زرو دوه سوه او شپږ دیرش کیلومټر مربع په پراختیا سره، دایران په جنوب لوېدیځ کې واقع شوی دی. د دې ولایت مرکز د اهواز ښار دی. د پارس تودی له راپور سره سم، دا ولایت د ځمکې او د زرخیزې خاورې له پلوه، د ایران یو تر ټولو له غورو هوارو ځمکو څخه دی چي د ښه موسم د امله په کښې د کاله دوه کښتونه تر سره کیږي.

پراخې هوارې سیمې، زرخیزې خاورې او د طبیعت ډول ډول والې، دغه ټاټوبې یې په یوه برکتناکه سیمه باندې بدله کړې په داسي ډول چي د کاله له ۱۷ میلیونو ټنو څخه زیات کرهڼیز محصولات تولیدوي.

د دې په څنګ کې نړیوالو اوبو ته لاسرسی، دغه ولایت یې، په یوه اصلي صادراتي مرکز باندې بدل کړی دی، د خرمشهر، آبادان، ماهشهر او امام خمینی بندرونه په دې ولایت کې دي، چي د دې ولایت او ټول هیواد لپاره یې ښه امتیازات رامینځته کړي دي.

د خوزستان ولایت په ایران کې د غنمو د تولید لومړی مقام لري او د ایران ۳۸ سلنه جواري او ۴۰ سلنه بوره په دې ولایت کې تولیدیږي.

دغه ولایت  همداشان په ایران کې د خرماوو تر ټولو لوی تولیدوونکی دی، د ایران د خرماو کابو ۳۰ سلنه هم له دې ولایت څخه صادریږي.

د دې محصولاتو په ترڅ کې د خوزستان ولایت توانیدلی دی چي د شبو ګلانو په تولید کې د ایران لومړی مقام خپل کړي دی. دا ولایت د نرګس او د ګلګلابو په  تولید کې بیا دوهم مقام لري.

همداشان د ګرمو او سړو اوبو ماهیان، جینګي او ورته نورو ډول ډول اوبزیو د پاللو امکان، د دې فعالیتونو سره اړوند په پروژو کې د پانګونو امکان دغه ولایت ته یې ځانګړې وړتیا بخښلې ده او د زیاتو کسانو لپاره یې د کسب او کار امکانات برابرکړی دی.

د خوزستان ولایت د کرهڼیزو محصولاتو او د ودانیو د جوړولو صنایعو په صادراتو او د تخنیکي اینجینرینګ د خدماتو د وړاندې کولو په برخه کې د پام وړ پرمختګ کړی او د عراق، عمان، امارات او قطر په شان نژدې هیوادونو ته د غیر تیلي صادراتو په برخه کې مهم رول لوبوي.

کرهڼیز محصولات، پټروکمیکل محصولات، فلزات او اوسپنې، معدني مواد او د ودانیو مصالې د خوزستان ولایت د صادراتي توکو څخه دي، چي عراق، چین، امارات، روسیې، ترکیې او سنګاپور ته صادروي.

د خوزستان  په ولایت کې د خرماو تولید او صادرات

خرما د خوزستان ولایت په تولیداتو کې مهم ځایګی لري او اوس د هیواد د خرماو د صادراتو 30 سلنه له دغه ولایت بهر ته صادریږي. د ابادان، شادګان، اهواز، خرمشهر، ماهشهر او بهبهان د دې ولایت د خرماو د تولید تر ټولو لوی مرکزونه دي.

د ایران صادراتي خرما، له مهمو باغي محصولاتو څخه بلل کیږي چي په ټوله دنیا کې زیات پلویان لري.

د خوزستان ولایت ښایسته ګلونه

 د خوزستان  ولایت د ځانګړې او بیلابیل موسم په لرلو سره، د ایران د ګلونو د تولید له مهمو سیمو څخه دي، د خوزستان ولایت د ګلګلابو، شبو ګلانو، نرګس ګل، داوودی، لیسیانتوس، ګلایول، لیلیوم، زنبق او اپارتماني بوټي لکه آزالیا، شمعداني، حنا، بګونیا، غاټول، بنت قنسول او نورو ډول ډول ونو د پالنې او تولید مرکز بلل کیږي.

عراق، ویتنام، آذربایجان جمهوریت، ترکمنستان، روسیه، ترکیه او د فارس خلیج د څنډې هیوادونه د دې ولایت د صادراتي ګلانو او بوټو بازار بلل کیږي.