د بخښنې نړیواله اداره:
د صهیونیست رژیم د جنایاتو په هکله دې څېړنې وشي
د بخښنې نړیوالې ادارې د غزې په ترانګه کې د اسرائیل د رژیم د تېرې میاشتې په ۵ ورځنیو بریدونو کې د جنګي جنایاتو په هکله د څېړنو غوښتنه کړې ده.
یاد سازمان په یوه راپور کې ویلي چي د صهیونیست رژیم هوایي بریدونه د غزې په تړانګه کې د عامو وګړو کورونه ویجاړ کړي چي دا د عامو فلسطینیانو د ډله ایزې سزا ورکولو په معنا ده او هیڅ یو فوځي توجیه نه لري.
د بخښنې د نړیوالې ادارې په اعلامیه کې راغلې: صهیونیست رژیم له ضرورت پرته په عامو فلسطینیانو هوایي بریدونه کړي چي په کښې د ماشومانو په شمول عامو وګړو ته مرګژوبله اوښتې ده او داسي بریدونه جنګي جنایت بلل کیږي.
یاده اداره د غزې په تړانګه کې د صهیونیست رژیم د ۹ هوایي بریدونو په هکله څېړني تر سره کړي او ویلي چي په یادو بریدونو کې ګڼ شمېر عام وګړي وژل شوي او د خلګو کورونه وران شوي دي.
د بخښنې نړیوالې ادارې د اعلامیې په پای کې ټینګار کوي چي دغه بهیر باید ختم شي او د غزې د تړانګې کلابندۍ ته د پای ټکۍ کښېښودل شي او د جنګي جنایاتو لاملین دې د نړیوالو قوانینو پر بنیاد سزا شي.
