د صهیونیسټ دښمن په پوستو د حزب الله پراخه برید
سحاب ـ د لبنان د حزب الله جنګیالیو یو ځل بیا د صهیونیسټي دښمن په مرکزونو پراخه بریدونه کړي.
سحاب شبکې د مهر خبري اژانس له قوله لیکلي: د لبنان حزب الله د جمعې په ورځ د یوې بیانیې په خپرولو سره اعلان وکړ، چې د دغه غورځنګ جنګیالیو د لسم ځل لپاره د لبنان په جنوب کې د «خیام» ښار په ختیځه څنډه کې د صهیونیسټی پوځیانو د راغونډیدو په ځای توغندی وویشتل.
د صهیونیسټ رژيم پوځ همدا راز په نیواک شویو سیمو د حزب الله د پراخو توغندیو، راکټ او ډرون حملو خبر ورکړ او زیاته یې کړه: د حزب الله یوه بې پیلوټه الوتکه نقب سیمې ته داخله شوې چې د دوی د دفاعي سیسټم لخوا کشف شوې ده.
د دغه راپور له مخې؛ له دغو حملو وروسته په نیواک شویو سیمو کې د بن ګوریون په ترټولو ستر هوایي ډګر کې الوتنې ځنډول شوي دي.
د لبنان حزب الله هم اعلان وکړ چې د لبنان په جنوب کې د شمعې قلعې ته نزدې یې د صهیونیسټي دښمن یو مرکاواي ټانک په یوه لارښود توغندي سره په نښه او ویجاړ کړی، چې په کې ناست ټول اشغالګر هم وژل شوي او ټپيان دي.
