اسراییلیانو د غزې د نیولو پرېکړه غندلې
زرګونه اسراییليانو د غزې ښار د نیولو او هلته د جګړې د پراخولو په تړاو د صهیونیسټي رژیم د امنیتي کابینې د پلان پر ضد لاریون وکړ.
لاریونوالو دا پرېکړه په کلکه غندلې ده.
راپورونه وایې چې لاریونوالو هڅه کړې له تل ابیب سره نښلېدونکې لارې د ترافیکو پر مخ وتړي خو پولیسو یې مخه نیولې.
لاریونونه د هغې ټولنې له لوري تنظیم شوي چې غړي یې په غزه کې د اسیر شویو اسراییلیانو خپلوان دي.
دوی د غزې د نیولو پر ځای د اسیرانو پر تبادلې ټېنګار کړی دی.
لاریونوالو اندېښنه ښودلې چې د غزې د جګړې پراخول به د اسیر شویو اسراییلیانو ژوند له ګواښ سره مخ کړي.
دا لاریونونه داسې مهال پيلېږي، چې د تېرې جمعې په ورځ د اسراییلو امنیتي کابینې د غزې ښار د نیولو طرحه تصویب کړه.
د اسراییلیانو د لاریونونو ترڅنګ بېلابېلو هېوادونو او سازمانونو هم د صهیونیسټي رژیم دا پرېکړه غندلې او له تل ابیب نه یې غوښتي چې خپله پرېکړه بېرته واخلي.
