ملګري ملتونه: په غزه تړانګه کې هېڅ خوندي ځای نشته
پارس ټوډی ـ د ملګرو ملتونو د بشري حقونو دفتر په غزه کې د صهیونیستي رژیم د بریدونو د زیاتېدو او د دغو بریدونو له امله د ماشومانو او ښځو د شهیدېدو یا ټپي کېدو په اړه ویلي چې په غزه کې هېڅ ځای خوندي نه دی او هېڅوک هم د تلابیب له بریدونو څخه په امن کې نه دی.
د پارس ټوډی د راپور له مخې، چې د صداوسیما خبري اژانس څخه یې نقل کړی، «په اشغال شوو فلسطیني سیمو کې د ملګرو ملتونو د بشري حقونو دفتر» په یوه راپور کې ویلي: سره له دې چې د اوربند له هوکړې څخه نږدې یو کال تېرېږي، په غزه تړانګه کې هېڅ خوندي ځای نشته او په دې سیمه کې هېڅوک هم په امن کې نه دي.
په دې راپور کې راغلي چې د تلابیب د اقداماتو دوام ملکي وګړو ته سخت زیان اړولی او په غزه تړانګه کې یې ناامني لا زیاته کړې ده.
نن سهار، شنبه، د صهیونیستي رژیم پوځ د توپچي ډزو په وسیله د غزې تړانګې ځینې سیمې وویشتلې.
د اسرائیلي پوځ د دې برید تمرکز د غزې په ختیځ کې د «التفاح» پر سیمې و.
همدارنګه، د صهیونیستي رژیم د پوځ د سمندري ځواکونو جنګي بېړیو او جنګي کښتیو د غزې تړانګې په جنوب کې د «خانیونس» ښار ختیځې سیمې هم په نښه کړې.
فلسطیني سرچینو ویلي چې د دې برید په پایله کې لږ تر لږه دوه فلسطینیان شهیدان او درې نور ټپیان شوي دي.
