یمن د سعودیانو لخوا خپله محاصره وغندله
د یمن د بهرنیو چارو وزارت د خپل هیواد د ځمکنیو، سمندري او هوايي سرحدونو بندیدل د یمن په مقاومو خلکو باندې په پراخه حمله کښې د سعودي د سیاسي او پوځي مشرانو د سربدالۍ او څرګندې ماتې نښه وبلله.
د العالم ټي وي چینل د خبر له مخې د یمن خارجه وزارت په یوه خبرپاڼه کښې د خپل هیواد د ځمکنیو، سمندري او هوايي سرحدونو بندیدل یوه زړه موضوع وبلله او ویې ویل: دا اقدامات د سعودي رژيم د حملې له پیل سره د نیغ په نیغه او پلان شوي کړاو ښودنه کوي چې په دې تیرو کلونو کښې د یمنیانو د ستونزو او لوږې د زیاتولو او ورته د ماتې ورکولو په موخه تعقیب شوي دي.
د یمن د خارجه وزارت په بیانیه کښې همداشان پر دغه هیواد تیري کښې د سعودي رژیم غیرانساني اقدامات، د صنعاء د هوايي ډګر د بند ساتلو لپاره د سعودیانو کوشش، د الحُدیده بندر محاصره او ورته د خوراکي او درملیزو توکو د کشتیو د ورتګ مخنیوی د یمن پر خلکو د دباو د زیاتولو او تسملیدو ته د هغوي د مجبورولو لپاره د دښمن د فعالیت او ماته خوړلو پروګرامونو یوه برخه بلله شوې ده.
