د سوریې پوځ (دیر الزور) صحرا په بشپړه توګه آزاده کړه
د سوریې د پوځ لوې قومندانۍ وویل چې د دغه هیواد پوځیانو د هوايي ځواک په ملاتړ سره (دیر الزور) صحرا د داعشي ترهګرو له نیواکه په بشپړه توګه آزاده کړه او د ۵ زره ۸۰۰ مربع کیلومیټرو په پراختیا سیمه یې پاکه کړه.
الاخباریه چینل نن خبر ورکړی چې د سورې د پوځ لوې قومندانۍ د یوې خبرپاڼې په خپرولو سره ټینګار کړی چې د حمص ولایت تر اداري پولو پورې د داعش اډې او پټنځي له مینځه تللي او پاتې تکفیري ترهګر هم تښتیدلي دي.
په یاده خبرپاڼه کښې راغلي دي: د سوريې د دې دومره پراخې صحرا پاکول او د عراق تر پولو رسیدل او په دې سیمه کښې د ترهګر نیټ ورک دړي وړي کول د سوري جنګیالیو په لوړې وړتیا د تایید ټاپه او په هیواد کښې د ترهګرو د تعقیب د دوام لپاره د وسله والو ځواکونو او پوځ د ټینګار نښه ده.
د سوریې پوځ همداشان د جبهة النصره ډلې د ترهګرو هغه عملیات هم شنډ کړل چې د سویل په درعا ښار کښې یې د پوځ په سنګرونو باندې د بم ایښودل شویو ګاډو د حملې نیت درلود.
د سوریې پوځ له پرون څخه د ترهګرو له نیواکه د درعا ښار د آزادولو عملیات پيل کړي دي.
