اسماعيل هنيه: د فلسطين آرمان د ټول اسلامي امت مسئله ده
د فلسطين د اسلامي مقاومت د غورځنګ حماس د سياسي دفتر مشر د اسلامي وحدت په نړيوال کانفرنس کښې په دې باندې په تاکيد سره چې صهيونېسټ رژيم د اسلامي امت اصلي دښمن دے وويل، د فلسطين آرمان د يو قوم، ګوند يا ډلې مسئله نه ده بلکه د ټول اسلامي امت مسئله ده.
اسماعيل هنيه نن په تهران کښې د اسلامي وحدت د دوه دېرشم نړيوال کانفرنس د پرانېستې په موقع د ويډيو کانفرنس په شکل وېنا کښې له صهيونېسټ رژيم سره د هر ډول تعلقاتو د بائيکاټ او جرم بللو په ضرورت باندې په تاکيد سره وويل: د فلسطين ملت به هيڅکله د پېړۍ د معاملې د عملي کېدو اجازه ورنکړي.
هغه په دې باندې په تاکيد سره چې د غاصبانو په مقابل کښې مقاومت د اسلامي امت د وحدت او يو والي سبب دے زياته کړه، د فلسطين وطن د يهودي کولو لپاره ټول کوششونه به تاريخ او جغرافيا بدله نه کړې شي او د امريکې ولسمشر ډونالډ ټرمپ حق نه لري چې قدس شريف او حتی د فلسطين يوه لوېشت خاوره اسرائيلي دښمن ته ورکړي.
د حماس د سياسي دفتر مشر په دې باندې په تاکيد سره چې مقاومت د نيواکي زمکو د بيا اخېستلو يوازېنے آپشن دے، واضحه کړه، د هغو ټولو مشکلاتو او خنډونو باوجود چې دښمانو د اسلامي نظامونو لپاره رامنځته کړي دي د اسلامي وحدت نړيوال کانفرنس دا زېرے ورکوي چې اسلامي امت په هرډول حالاتو کښې د وحدت په لوري حرکت کولې شي.
