د لبنان وزيراعظم استعفاء ورکړه
د لبنان وزيراعظم سعدالحريري له خپل پوسټه استعفاء ورکړه.
د لبنان وزيراعظم سعد الحريري پرون د دغه هېواد د خلقود احتجاجونو په ديارلسمه ورځ په يو اخباري کانفرنس کښې د خپلې او د لبنان د حکومت استعفاء اعلان کړه.
د ايران پرېس د رپوټ له مخې له دې مخکښې سعدالحريري په لبنان کښې د مظاهرو د شروع کېدو له وخت نه پس د دويم ځل لپاره احتجاج کونکو ته وېنا وکړه.
الحريري وويل، تل له خطراتو څخه د هېواد ملاتړ لپاره هلي ځلې شوې دي خو نن لاره بندون ته رسېدلې ده او خپله استعفاء د لبنان ولسمشر مېشل عون ته وړاندې کوي.
سعدالحريري د ۲۰۱۶ کال په دسمبر کښې د لبنان د وزيراعظم په توګه معرفي شو. الحريري د ۲۰۱۷ کال په نومبر کښې په داسې حال کښې چې په سعودي يرغمل کړے شوے ؤ د لبنان له وزيراعظمۍ څخه خپله استعفاء اعلان کړ، خو له سعودي څخه د وتلو وروسته يې خپله استعفاء بېرته واخېسته.
