ټي ټوینټي کرکټ ورلډ کپ
آسټریلیا پاکستان ته په ماتې ورکولو سره فاینل ته ورسیدله
د کرکټ د شل اووریز نړیوال کپ د سیالیو په سیمي فاینل لوبه کښې نن پاکستان له سختې مقابلې وروسته له آسټریلیا نه ماتې وخوړله
په متحده عرب اماراتو کښې د کرکټ د ټي ټوینټي ورلډ کپ سیالیو په سیمي فاینل کښې نن د آسټریلیا او پاکستان ټیمونه سره مخامخ شول. آسټریلیا د ټاس په ګټلو سره پاکستان ته د بیټنګ یا توپ وهنې بلنه ورکړه. د پاکستان ټیم په ټاکلو شلو اورونو کښې د ۴ لوبغاړو په سوځیدو سره ۱۷۶ منډې وکړې چې په کښې د اوپنر محمد رضوان ۶۷ او د فخر زمان ۵۵ او د کپتان بابر اعظم ۳۹ رنز شامل وو.
په ځواب کښې د آسټریلیا ټیم له سختې مقابلې وروسته د ۱۷۷ رنزو هدف په ۱۹ اوورونو کښې د ۵ لوبغاړو په آوټ کیدو سره پوره کړ. په پاکستاني بالرانو کښې شاداب خان د ۲۶ رنزو په ورکولو سره ۴ آسټریلیايي لوبغاړي آوټ کړل او داسې ښکاریده چې لوبه پاکستان ګټي خو داسې ونه شول او د آسټریلیا ټیم دغه سیالي په پنځو وکټو وګټله.
آسټریلیا به د ۲۰۲۱ کال د ټي ټوینټي ورلډ کپ په فاینل یا پاې لوبه کښې له نیوزي لینډ سره سیالي وکړي.
