د هالنډ بهرنیو چارو وزیر له دندې استعفا وکړه
وروسته له هغې چې د اسرائیل پر ضد د بندیزونو لپاره یې د کابینې ملاتړ ترلاسه نکړ، د هالنډ د بهرنیو چارو وزیر له خپلې دندې استعفا ورکړه.
د را پورونو له مخې؛ د هالنډ د بهرنیو چارو وزیر کاسپر ویلډکیمپ په غزه کې د اسرائیلي پوځي یرغل پر ضد د اضافي بندیزونو لپاره د کابینې د ملاتړ ترلاسه کولو په برخه کې د ناکامۍ وروسته استعفا ورکړه.
په استعفا پورې اړوند بیان کې، کاسپر وویل: “ما د اضافي او معنادارو اقداماتو لپاره د ملاتړ ترلاسه کولو کې ناکامي وخوړه.”
هغه زیاته کړه: “زه وینم چې په غزه کې څه روان دي. د کابینې په توګه موږ له دې وړاندې څو اقدامات کړي دي. هالنډ ته د شرمېدو هیڅ دلیل نشته، خو د اضافي اقداماتو په اړه ما په کابینه کې څو ځله مقاومت احساس کړ.”
د یادونې وړده، چې تر دې وړاندې هم هالنډ په اسرائیلو یو شمېر بندیزونه لګولي، خو یاد وزیر په ګڼ شمېر نورو بندیزونو لګولو ټینګار کاوه.
