په هند کی د چاودنې له کبله نهه پوځیان وژل شوی

د هند په چهتیس ګړ ایالت کې په بمی چاودنه کې د دغې هېواد نوولس پوځیانو ته مرګ ژوبله اوښتې ده. د هندی رسنیو د راپورونو له مخې، چاودنه د یاد ایالت په سکما سیمه کې د پوځیانو په یوه ډک موټر ترسره شوې، چې له کبله یې نهه پوځیان وژل شوی او لس تنه نور ټپیان دی.

ځایی سرچینې وایی، چې د ټپیانو له ډلې د څلورو پوځیانو حالت ښه نه دی.

سرچینې زیاتوی، چاودنه هغه مهال رامنځته شوې کله چې د هندی پوځ (سی آر پی ایف) له لوری په سیمه کې د ماویست وسله والې ډلې پر ضد عملیات روان و.

له چاودنې وروسته امنیتی مسئولینو په چهتیس ګړ ایالت کې ټولو امنیتی ادارو ته د تیارسۍ امر کړی.

ماویست وسله والې ډلې تر دې مخکې هم په هندی پوځیانو بریدونه کړی چې لسګونه پوځیانو پکې خپل ژوند له لاسه ورکړی.