ترکیې د سوریې شمالی سیمو ته نورې وسلې واستولې

ایرنا خبری اژانس وایی د ترکیې پوځ پرون په سوریې کښې د خپلو عسکرو دملاتړ لپاره د «حماه» ولایت شمالی سیمو ته نوی پوځی تجهیزات واستول .

په دغو نویو تجهیزاتو کښې سل(۱۰۰) درانه ګاډی او پنځوس ټرکونه  چې تدارکاتی وسائل پکښې بار وو شامل دی .

دترکیې دغه نوی تجهیزات او درانه ګاډی او وسلې دسوریې د حماه ولایت د مورک(Murak) ښار په خوا کښې دیره شوی دی .

د «احرار الشام» او د «فیلق الشام»  دترهګرو ډلو غړیو دترکیې د دغو پوځی تجهیزاتو بدرګه کوله .

دترکیې پوځ او دهغه دملاتړ وړ ترهګرو د روان میلادی کال د مارچ دمیاشتې په اتمه(۸) نیټه دسوریې په شمال کښې عفرین ښار ونیوه .

سوریې په ځلونو په خپله خاوره کښې د ترکیې پوځی عملیات یو(۱) نیواکګر اقدام بللی او هغه یې دخپلې واکمنۍ خلاف ورزۍ بللی او دغه کار یې غندلی دی .