مطبوعاتو ته کتنه

د تهران چاپ د آرمان امروز په ورځپاڼه کی د صهیونیسټی رژیم د رسندویو په حواله لیکل شوی:« محمد بن سلمان ویلی دی؛ فلسطینیان یا وړاندیزونه قبول کړی، یا غلی اوسی! »

د آرمان ورځپاڼی په لیکنه؛ د اسرائیل د معاریو ورځپاڼی، امریکی ته د عربستان د ولیعهد په سفر کی، د یهودی سازمانونو له نمایندګانو سره په کتنه کی د« محمد بن سلمان » د ویناؤو جزئیات افشا کړل.

محمد بن سلمان پدغه لیدنه کی ویلی ؤ، د فلسطین مسئله د عربستان دولت لپاره لمړیتوب نه لری، د ایران په شان لا مهم مسایل وجود لری، او فلسطینیان باید غلی شی، او له شکایت کولو څخه دی لاس واخلی».

بن سلمان پدې کتنه کی ویلی ؤ: د فلسطین مشرتابه، له تیرو ۴۰ کلونو راهیسی فرصتونه له لاسه ورکړی دی، او له ټولو وړاندیزونو سره مخالفت کوی. فلسطینیان باید هغه وړاندیزونه، چی هغوی ته ورکول کیږی ومنی، او د خبرو اترو میز ته را وګرځی، یا دی غلی اوسی او له شکایتونو څخه لاس واخلی.

د معاریو ورځپاڼی ولیکل: چی پدې لیدنه کی د اسرائیل او عربستان د اړیکو په هکله خبری وشوې، او محمد بن سلمان په هغې ورځ کی وویل: د دغو دؤو لورو ترمنځ اړیکو کی، د نوی فصل د پرانیستلو وخت رسیدلئ دئ.

د صهیونیسټی رژیم ټلویزون ۱۰ می شبکی هم  اعلان وکړ؛ چی هغه کسان چی پدې کتنه کی یی ګډون کړئ ؤ، د بن سلمان له څرګندونو څخه هک حیران شوی ؤو، او په نیویارک کی یی د امریکی کنسولګرۍ ته د دغو څرګندونو خبر ورکړ.

د تهران چاپ د اطلاعات په ورځپاڼه کی،« په یمن کی د جګړې د پای کرښی د ځانګړنو » تر سرلیک لاندی په یو راپور کی لیکل شوی: په وروستیو ورځو کی د یو او بل په اډو د سعودیانو او د انصارالله ځواکونو د توپونو د ګولیو ډزې زیاتی شوی دی؛ یو لورئ د تیری لپاره، او بل لورئ د یمن له خاوری څخه د دفاع لپاره دغه کار سرته رسوی. پدی منځ کی د یمن دفاع کونکی، هماغه راز د آرامتیا رامنځته کیدل، پدی هیواد کی د بهرنیو مداخلو د ختمیدو په ګرو کی بولی.

د اطلاعات ورځپاڼی په لیکنه؛ د انصارالله ځواکونو، چی له ډیری مودې راهیسی له خپلی خاورې څخه په دفاع کی جنګیږی، پدی وروستیو کی د شرطمنی سولی د ټینګیدو لپاره خپل چمتو والئ اعلان کړئ؛ ترڅو د بهرنیو دخالتونو د ختمیدو په سیوری کی سوله ټینګه شی. دری کاله کیږی، چی عربستان د« عبدربه منصور هادی » د استعفا کړی او تښتیدلی کس، د دولت د بیرته راګرځولو په موخه، او په یمن کی د ثبات او آرامتیا د ټینګولو په پلمه، دغه هیواد د خپلو دوامدارو حملو او هوایی بمباریو په نښه کړئ، او په مقابل کی یی اډې؛ د انصارالله د توغندیو په نښه شوی؛ داسی حملی چی په جدی توګه، د تیرکال د لیندۍ له میاشتې پیل شوې.

د انصارالله غورځنګ د سیاسی شورا د بهرنیو اړیکو مسؤل «حسین العزی» له « اسپوتنیک » روسی خبری آژانس سره په خبرو کی وویل: که د عربستان په مشرۍ د عربی ائتلاف تیرئ بند شی، طبیعی ده چی د هغه په مقابل کی حملی هم ، چی د یمن له خاوری څخه په دفاع کی بڼه نیسی؛ بندیږی.

*******

د تهران چاپ د ایران په ورځپاڼه کی، د فرانسی له ؤلس مشر سره د ایران د اسلامی جمهوریت د ؤلس مشر په ټلفونی خبرو کی، د هغه قوله راغلی دی:« ایران؛ له خپلو ژمنو برسیره هیڅ محدودیت نه منی »

او د فرانسی ؤلس مشر« مکرون » هم ویلی:« اروپا؛ برجام هماغه ډول چی دئ قبول لری/ سل په سلو کی په برجام کی پاتیږو.

د ایران د ورځپانی په راپور کی زیاته شوې؛ د آلمان- بریتانیی او فرانسی هیوادونو، په نوې بیانیه کی د اټمی جامع پروګرام( برجام )

په ساتنی د ټینګار په کولو سره، له دغې موافقې څخه بهری نوی موضوعګانی مطرح کړې.

پرون د دریو اروپایی هیوادونو د ګډې بیانیی له خپریدو سره په یو وخت؛ چی برجام یی ډیره ښه موافقه بللې وه، د فرانسی ؤلس مشر هم؛ د ایران له ؤلس مشر سره په ټلفونی خبرو کی ټینګار وکړ؛ چی د اروپا اتحادیه او فرانسه،« برجام » هماغه ډول چی دئ قبول لری.

د دغه راپور په اساس، ښاغلی روحانی د پرون یکشنبی په مازدیګر، له« امانوئل مکرون » سره په ټلفونی خبرو کی، دیته په اشارې سره؛ چی ایران له فرانسې سره د اړیکو ټینګښت ته زیات اهمیت ورکوی، څرګنده کړه: د برجام پایداره پاتی کیدل؛ د سیمه ایز امنیت او همکارۍ سبب دی. زموږ ترمنځ اړیکی د اعتماد په اساس دی، او برجام د ایران او لویدیځو هیوادونو ترمنځ د باور مهم بنسټ دئ.

*******

اوس هم د کابل چاپ ورځپاڼی را اخلو چی د افغانستان د بدلونونو په اړه یی څه لیکنی کړی دی:

کابل چاپ ورځپاڼو په خپلو نننیو ګڼو کې هم د را روانو انتخاباتو په اړه یو شمېر لیکنې او سرلیکنې چاپ کړی دی.

مسیر

مسیر خپلواکې ورځپاڼې په‎دې اړه په خپله سرمقاله کې لیکلی، ټاکنې کېږی که مسخره کېږی؟

ورځپاڼه لیکی د ټاکنو لپاره د نوم‎لېکنې او تیاریو په تړاو اندېښنې ورځ تر بلې زیاتېږی، له یوه اړخه د خلکو کمه نوم‎لیکنه او له بله اړخه د ټاکنو په څرنګوالی او پروسیجرونو جدی نیوکې شته چې نه ورته د ټاکنو کمېسیون وړ ځواب لری او نه‎یې هم حکومت په تړاو څرګند دریځ.

په سرمقاله کې راغلی، دغو اندېښنو ته په پام سره اوس پوښتنه دا ده چې د راتلونکو ټاکنو برخلیک به څه وی؟

ورځپاڼه دا هم لیکی چې اوس خلک نوم‎لېکنه نه‎کوی، او د نوم‎لیکنې لپاره مشخصې غوښتنې لری، خو کمېسیون او حکومت د خلکو د غوښتنو پرځای یوازې هڅونه کوی چې په باور یې، د ټاکنو لپاره د کمېسیون او حکومت اوسنۍ کړنې د ټاکنو د مسخره کولو په معنی دی.

دنیا

دنیا خپلواکې ورځپاڼې په‎خپله سرمقاله کې د موضوع په تړاو لیکلی دی، را روان انتخابات به د خلکو او حکومت تر منځ ګڼ مسایل روښانه کړی.

په سرمقاله کې راغلی دا به هم روښانه شی چې خلک په کومه اندازه د یوې مهمې ملی پروسې د امنیت په خوندیتوب کې د حکومت په وړتیا باور لری او دا هم چې ایا حکومت کولای شی د یوې روغې او شفافې پروسې په اړه خلکو ته ژمنه ورکړی؟

ورځپاڼه لیکلی، تراوسه د رأیو ورکوونکو د نوم‎لېکنې بهیر ډېر پڅ روان دی، خو حکومت مسؤلیت لری چې په پاتې موده کې خلک په‎دې قانع کړی چې په را روانو انتخاباتو کې په خپل پراخ ګډون سره، له زور واکو د درغلیو فرصت واخلی، کوم چې د ورځپاڼې په باور د یو شمېر راپورونو له مخې سر له اوسه ورته ملاې تړل شوې دی.

ملی آرمان

ملی ارمان خپلواکې ورځپاڼې بیا د ولسی جرګې او ولسوالیو د شوراګانو د انتخاباتو په اړه د ولسمشرۍ د تېر ځل په انتخاباتو کې د ولسمشر محمد اشرف غنی د یو رقیب زلمی رسول په حواله لیکلی دی.

د مطلب لیکونکی لیکی، ښاغلی رسول ویلی چې د افغانستان خلک نور په هېڅ وجه تقلبی انتخابات نه‎منی، د ورځپاڼې په خبره نوموړی دا هم ویلی که څوک داسې فکر کوی نو دا ناشونې ده.

انیس

انیس دولتی ورځپاڼې بیا په خپل یو مطلب کې په‎دې اړه لیکلی، په کابل کې د امریکا سفیر جان بس ویلی چې هېواد یې په بېلابېلو برخو له‎دې ډلې د انتخاباتو په برخه کې له افغانستان سره مرسته وکړی.

انیس لیکلی، په کابل کې د امریکا سفیر زیاته کړې چې په افغانستان کې انتخابات د دغه هېواد خلکو او نړیوالې ټولنې لپاره ډېر مهم او با ارزښته دی.

په مطلب کې د نوموړی په حواله دا هم راغلی چې د شفافو او عادلانه انتخاباتو د جوړولو لپاره له افغان حکومت سره زموږ هڅې روانې دی او دا د افغان دولت او د افغانستان د انتخاباتو

خپلواک کمېسیون مسؤلیت دی چې انتخابات په شفاف ډول ترسره کړی.