ډونالډ ټرمپ د امریکا د ولسمشرۍ جوګه نه دی
تسنیم خبري اژانس وايي د امریکا د ملي امنیت پخواني سلاکار جان بولټن د ولسمشر ډونالډ ټرمپ په کړچار نیوکې سره وویل هغه د هیواد د ولسمشرۍ د څوکۍ جوګه نه دی .
جان بولټن له ای بي سي نیوز ټیلي ويژن سره په مرکه کښې په دې خبرې ټینګار سره چې ډونالډ ټرمپ د امریکا د ولسمشرۍ د څوکۍ لپاره مناسب انتخاب نه دی وویل ټرمپ یوازې د روان میلادي کال د ولسمشرۍ په انتخاباتو کښې د بیا بریالیتوب هڅه کوي .
د امریکا د ملي امنیت د پخواني سلاکار جان بولټن دغه څرګندونې په داسې حال کښې کړي دي چې نوموړی کوشش کوي د خپل نوي کتاب په خپرولو سره له ولسمشر ټرمپ سره د خپل کار کولو خاطرې بیان کړي خو ولسمشر ټرمپ ډیره هڅه پیل کړي ده چې د دغه کتاب د خپریدا مخه ونیسي .
د امریکا ولسمشر ټرمپ پرون د ملي امنیت د پخواني سلاکار جان بولټن د کتاب خپریدا ته په غبرګون کښې وویل د جان بولټن ډیر ستړی کونکی کتاب له دروغو او جعلي قیصو ډک دی .
د امریکا د باندنیو چارو وزیر مایک پمپئو هم د ملي امنیت پخوانی سلاکار جان بولټن د هغه څه په دلیل چې په نوي کتاب کښې د دروغو اطلاعاتو خپریدل یې وبلل خائن وباله .
د جان بولټن په نوي کتاب کښې د امریکا د ولسمشر ټرمپ له خپلو اختیاراتو د ناوړه استفادې او د روان میلادي کال په انتخاباتو کښې له بریالیتوب سره د مرستې لپاره له چین څخه د غوښتنې په شان ډیر موردونه شته .
د جان بولټن د کتاب خپرونکي سایمون اینډ شوسټر وویل دا داسې کتاب دی چې د امریکا ولسمشر ټرمپ یې نه غواړي خلک هغه ولولي .
