په مرکزي غزې کښې یولس نور فلسطینیان شهیدان شول
Aug 18, 2024 14:52 Asia/Kabul
زمونږ خبریال راپور راکړی نن په مرکزي غزې کښې په څو سیمو باندې د صهیونیسټ رژیم د پوځ په بریدونو کښې یولس نور فلسطینیان شهیدان شول.
په الاقصی شهیدانو روغتون کښې طبي سرچینو وویل په دیر البلح ښار باندې د اسرائیلو په یوه برید کښې اوه فلسطینیان شهیدان او څو نور ژوبل شول.
دغه راز څلور نور فلسطینیان په مرکزي غزې تړانګه کښې په نصیرات کډوالو کیمپ باندې د اسرائیلو په یوې بلې حملې کښې شهیدان شول او څو نور ژوبل هم شول.
عیني شاهدانو وویل چې د اسرائیلو توپونه چې د غزې تړانګې په ختیځ کښې دیره دي په مغازي او بریج کیمپونو او په دیر البلح سیمو سختې ډزې کوي.
بل خبر دا چې د غزې په جنوب کښې یوه قبر کیندونکي نجي ابو خاطب(Najy Abu Hateb)وویل په غزې کښې هره ورځ سلګونو مړي خاورو ته سپارل کیږي او د مړیو د ښخولو لپاره اوس هیڅ ځای نشته.
هغه وویل زه شپه ورځ قبرونه کندم او ستړی شوی یم.
دغه قبر کیندونکي وویل زه غواړم چې دغه جنګ زر ختم شي.
ټیګونه