کوثري: امريکا د صهیونیستي رژیم د مهارولو اراده نه لري

پارس ټوډې- د ایران د اسلامي شورا د ملي امنیت کمېسیون غړی په دې باور دی چې امریکایان د صهیونیستي رژیم د مهار او کنټرول په لټه کې نه دي، ځکه چې دوی غواړي سیمه تل له اسرائیلیانو د وېرې په حالت کې پاتې شي.

د پارس ټوډې د راپور له مخې، د ایران د اسلامي شورا د ملي امنیت کمېسیون غړي، اسماعیل کوثري،   د صهیونیستي تروریستي رژیم د پوځي هوايي تحرکاتو په غبرګون کې چې د ایران شاوخوا کې ترسره شول او د ایران اسلامي جمهوریت د خاتم الانبیاء (ص) مرکزي قرارګاه د جدي خبرداري په غبرګون کې وویل: صهیونیسټان هغه ناسکه جراثیم دي چې هېڅ قانون او ژمنې ته پابند نه دي. دا رژیم چې د امريکا او انګلستان زېږنده دی، یوازې د جګړې لپاره رامنځته شوی او جګړه د دوی وجود او هستي ده چې د بدلون وړ نه ده. موږ له امريکا سره یو تفاهم‌لیک لاسلیک کړی چې یو له بندونو څخه یې د صهیونیستي رژیم مهارول دي، خو حتی  خپله امريکا هم د دې کار توان نه لري.

کوثري وروسته یادونه وکړه: امریکایان د جګړې د ختمېدو په لټه کې نه دي، ځکه چې د دوی ټوله نړۍ په جګړې پورې تړلې ده. له بلې خوا، د لبنان په جبهه کې د جګړې ختمېدل هغه څه نه دي چې امریکایان یې غواړي، ځکه چې دوی غواړي سیمه تل د صهیونیستي رژیم له وېرې سره مخ پاتې شي.

هغه ټینګار وکړ: د خاتم الانبیاء (ص) قرارګاه اعلامیه د ایران د اسلامي جمهوریت او وسله‌والو ځواکونو د بشپړ چمتووالي ښودنه کوي چې د هېواد له ځمکنۍ بشپړتیا دفاع وکړي او هر ډول ګواښ او تحرک به حتماً له سخت ځواب سره مخ شي.