The Guardian: Qindra civilë janë vrarë në sulmet britanike në Mosul me pretekstin e luftimit të ISIS
Hulumtimi i ri i gazetës britanike "The Guardian" tregon se, ndryshe nga pretendimi i autoriteteve britanike se asnjë civil nuk u dëmtua në sulmet ajrore të viteve 2016-2017 kundër ISIS-it në Mosul të Irakut, këto sulme rezultuan me vdekjen e shumë civilëve irakianë.
Qeveria dhe ushtria britanike kanë pretenduar për vite se forcat e këtij vendi kanë zhvilluar një luftë "të përsosur" kundër ISIS në Irak në mbrojtje të qytetarëve irakianë. Megjithatë, aleatët e koalicionit të ashtuquajtur kundër ISIS të udhëhequr nga SHBA, duke përfshirë Uashingtonin, kanë pranuar se qindra civilë janë vrarë në Irak në mbështetje të forcave tokësore irakiane në periudhën e pas vitit 2014.
Gazeta britanike "The Guardian" në një hulumtim të kryer në bashkëpunim me organizatën jofitimprurëse "Airwars", shkroi: "Tani ka identifikuar 6 sulme në qytetin irakian Mosul që kanë rezultuar në vdekjen e dhjetëra civilëve dhe duket se këto sulme janë kryer nga forcat britanike në vitin 2016 dhe 2017".
Sipas këtij raporti, viktimat e dy sulmeve të dyshuara britanike kanë raportuar për herë të parë se fëmijë, prindër, vëllezër dhe motra janë vrarë dhe plagosur nga sulmet me raketa që shkatërruan familjet e tyre.
Koalicioni i ashtuquajtur kundër ISIS i udhëhequr nga SHBA-ja ka pranuar viktimat civile në të dy sulmet ajrore, por nuk ka thënë se cili vend i qëlloi ata. Në total, gjatë gjashtë sulmeve në Mosul të Irakut të identifikuara nga "The Guardian" dhe "Airwars" si sulme të mundshme britanike, koalicioni ka pranuar se ka vrarë të paktën 26 civilë irakianë sipas pohimeve zyrtare, por numri real është më i madh.
Ministria britanike e mbrojtjes refuzoi të konfirmojë apo mohojë nëse sulmet janë kryer nga forcat e saj, duke pretenduar se forcat britanike nuk kanë dëmtuar civilët në Irak.
"The Guardian" sqaroi: "Edhe nëse Mbretëria e Bashkuar përfundimisht pranon përgjegjësinë për vrasjen e civilëve, nuk ka gjasa që të mbijetuarit të jenë në gjendje të marrin kompensim. Ligji, i miratuar në vitin 2021, përcakton një parashkrim 6-vjeçar për çdo kërkesë për dëmshpërblim, i cili tashmë ka skaduar".
