Alexey Navalny vdes në burg
Aktivisti rus dhe lideri i opozitës ruse Alexey Navalny ka vdekur në burg në Rusinë veriore, njoftoi të premten media shtetërore e vendit.
Navalny, 47 vjeç, i cili u bë një nga titujt kryesorë botërorë në vitin 2020 për dyshimin se u helmua me gaz nervor Novichok, vdiq të premten në një koloni penale në veri të Qarkut Arktik.
Navalny u ndje keq pas një shëtitjeje dhe pothuajse menjëherë humbi vetëdijen, njoftoi shërbimi i burgut, duke shtuar se një hetim ishte nisur për të përcaktuar shkakun e vdekjes së papritur të tij.
Zëdhënësi i Kremlinit Dmitry Peskov tha se presidenti rus Vladimir Putin është informuar për vdekjen dhe se u takon mjekëve të përcaktojnë shkakun e vdekjes së tij.
"Me sa jemi në dijeni, në përputhje me të gjitha rregullat, shërbimi i burgut po kryen kontrolle dhe sqarime," u tha Peskov gazetarëve. I pyetur për raportet se vdekja përfshinte një mpiksje gjaku, ai u përgjigj: “Nuk e di. Mjekët duhet ta zbulojnë.”
Zëdhënësja e Navalny, Kira Yarmysh, shkroi në rrjetin X, se avokati i tij po udhëton për në burgun në qytetin Kharp. “Sapo të kemi ndonjë informacion, ne do ta raportojmë atë”, shtoi Yarmysh.
Navalny, i cili kishte organizuar disa nga protestat më të mëdha anti-qeveritare të parë në vitet e fundit, u kthye në Rusi në vitin 2021 për të vuajtur dënimet e tij me burg për mashtrim dhe dënime të tjera, duke u dënuar me 11.5 vjet burg.
