Kina: Shteti palestinez çelësi për t'i dhënë fund padrejtësisë më jetëgjatë në botë
Ministri i Jashtëm i Kinës, Wang Yi, tha se duhet bërë shumë më tepër për krijimin e një shteti të pavarur palestinez, i cili është zgjidhja e vetme për padrejtësinë më të gjatë në botë.
“Brezat e popullit palestinez janë zhvendosur nga toka e tyre, të paaftë për t'u kthyer në shtëpitë e tyre deri më sot. Kjo është padrejtësia më jetëgjatë në botën tonë”, tha të shtunën ministri i Jashtëm i Kinës në Konferencën e Sigurisë së Mynihut në Gjermani.
Duke folur mbi rrethanat aktuale në Gaza mes sulmeve të Izraelit, ministri i Jashtëm kinez nënvizoi nevojën për të synuar shkakun rrënjësor të konfliktit për vendosjen e paqes në rajon.
Wang bëri thirrje për një armëpushim të menjëhershëm në Gaza. Ai shprehu shqetësim të thellë për vrasjen e civilëve palestinezë në territorin e rrethuar palestinez që nga 7 tetori dhe tha se ishte e papranueshme që një situatë e tillë të vazhdojë në shekullin e 21-të.
"Ne duhet të bëjmë thirrje për zgjidhjen e duhur të çështjes së Palestinës, e cila ka zgjatur për më shumë se 70 vjet", tha Wang.
Ministri i Jashtëm kinez tha se Kina është një faktor për stabilitet edhe në çështje të vështira duke pasur parasysh rolin e saj ndërmjetësues në një seri konfliktesh.
