Саргардонии 500 мусофир ба мақсади Русия дар фурудгоҳи Кӯлоб
-
Агентии авиатсияи граждании Тоҷикистон ба се ҳавопаймоии ширкати “Сибир” ба мақсади се шаҳри Русия иҷозатномаи парвоз надод
Агентии авиатсияи гражданӣ ин дафъа парвозҳои ширкати ҳавопаймоии “Сибир”-ро боздошт.
Ба нақл аз Тоҷвик, бо сабаби боздошти иҷрои парвозҳо тариқи хатсайрҳои ширкати ҳавопаймоии “Сибир” зиёда аз 500 нафар мусофир дар фурудгоҳи Кӯлоб дармондаанд.
“Агентии авиатсияи гражданӣ бо сабабҳои номаълум дар лаҳзаҳои охир иҷрои парвозҳои моро боздошт”, - гуфтааст муовини директори намояндагии ширкати “Сибир” Ҷӯрабек Тоҷибеков.
Ба гуфтаи ӯ, ширкати ҳавопаймоии “Сибир” аз Душанбе, Хуҷанд ва Кӯлоб ба шаҳрҳои Владивосток, Новосибирск, Саратов, Барнаул ва Волгоград парвозҳои чартерӣ анҷом медиҳад.
“Нархи билетҳои мо аз арзиши мувофиқашуда бо Агентӣ зиёд нест. Лекин масалан, имрӯз, 21 май парвози ҳавопаймоҳои ширкати мо ба самти Кемерово, Волгоград ва Барнаул аз фурудгоҳи Кӯлоб боздошта шудааст. Ҳавопаймо ба Кемерово бояд субҳи дирӯз соати 9 парвоз мекард”, - иброз дошт Тоҷибеков.
Айни замон ба қавли номбурда, дар фурудгоҳи Кӯлоб зиёда аз 500 нафар мусофир иҷрои парвозро бо хатсайри худ интизоранд.
“Рӯзҳои охир иҷрои парвоз боз тариқи якчанд хатсайр боздошт шуда, лекин мо мусофиронро ба дигар хатсайрҳо гузаронидем. Чанд рӯз пеш Агентӣ ба ширкат мактуб фиристода, дархост намуд, ки ҳадди ниҳоии нархи билет 500 доллар муқаррар шавад”, - гуфтааст намояндаи ширкат.
Ёдрас мекунем, ки Агентии авиатсияи граждании ҷумҳурӣ аз 11 май парвози ширкатҳои «Северный ветер» ва «Сибир»-ро боздошта, инро ба зиёд будани нархи билетҳо маънидод кард.
Чанд рӯз пеш Агентӣ ба таври истисно ба ширкатҳо иҷоза дод, ки барои бурдани мусофирони аллакай билетдошта аз фурудгоҳҳои Душанбе ва Хуҷанд парвозҳоро анҷом диҳанд.
Он вақт дар Агентӣ изҳор дошта буданд, ки танҳо дар сурати аз ҷониби ширкатҳо муқаррар шудан нархи қаблан мувофиқашуда, ба барқарор гардидани парвозҳо иҷоза медиҳанд.
Бештар бихонед:
