Saud Arabystany TOPH-a maýa ýatyrýar
19-njy ýanwarda, Türkmenistanyň Ministrler kabinetiniň mejlisinde ýurduň nebit-gaz toplumyna gözegçilik edýän wise-premýer Maksat Babaýew Saud Arabystanynyň TOPH gaz geçiriji proýekti üçin düýpli inwestisiýa ýollaýandygyny habar berdi.
Babaýewiň sözlerine görä, inwestisiýa Türkmenistanyň prezidentiniň 2016-njy ýylyň maýynda Saud Arabystany patyşalygyna amala aşyran resmi sapary mahalynda gazanylan ylalaşyklar netijesinde alyndy. TOPH üçin maliýe serişdesi Saud Arabystanynyň Ösüş fondy tarapyndan bölünip berildi.
Habarda beriljek sermaýanyň möçberi, şeýle-de bu ylalaşygyň nähili şertler esasynda baglaşylandygy aýdylmaýar.
Türkmenistanyň prezidenti Saud Arabystanynyň patyşasyna sermaýa üçin minnetdarlyk hatyny.
“Türkmenistanyň Prezidenti Gurbanguly Berdimuhamedow iki Mukaddesligiň Hyzmatkäri, Saud Arabystanynyň Patyşasy Salman ben Abdelaziz Al Sauda Türkmenistan –Owganystan-Pakistan-Hindistan gaz geçirijisiniň gurluşygynda ulanmak maksady bilen, Saud ösüş gaznasynyň maýa goýum serişdelerini iberendigi üçin çuňňur minnetdarlyk hatyny iberdi” – diýip,TDH ýazýar.
Türkmenistanyň prezidenti Saud Arabystanynyň patyşasyna “Gudraty Güýçli Allatagaladan berk jan saglyk, uzak ömür, Saud Arabystanyň halkyna bolsa parahatçylyk we abadançylyk arzuw etdi” diýip, habarda aýdylýar.
Ýatladýarys, Saud Arabystanyndan başga, döwlet habar gullugynyň maglumatyna görä, TOPH proýektine maýa ýatyrmaga Birleşen Arap Emirlikleri hem gyzyklanma bildirýär. Bir hepde ozal BAE-de Türkmenistanyň daşary işler ministriniň orunbasary Berdinyýaz Mätiýew bilen BAE-niň daşary işler we halkara hyzmatdaşlygy ministri, şeýh Abdullah bin Zayed Al Nahýanyň duşuşugy boldy.
Türkmenistanyň Prezidenti Gurbanguly Berdimuhamedow hem 2017-nji ýylyň 20-nji dekabrynda Aşgabatda şeýh bilen duşuşdi. Şol wagt ýerli metbugatyň habar bermegine görä, arap maýadarlary bu duşuşyk mahalynda TOPH gaz geçiriji proýektiniň durmuşa geçirilmegine gyzyklanma bildirdiler.
Saud Arabystanlylar TOPH-da maýa ýatyrýarlar,emma
Owganystanda YD-nyň peýda bolandygy üçin Putin TOPH-yň üstünlikli boljagyna şübhe bildirýär.
Putiniň pikirine görä, ýagdaýy agyrlaşdyrýan we seresap bolmaga itekleýän element Owganystanda “Yslam döwleti” toparynyň söweşijileriniň peýda bolmagy we eýýäm, “Talyban” bilen gapma-garşy durmaga başlamagy.
Ýatladýarys, 2017-nji ýylyň noýabrynda Wladimir Putiniň Eýrana sapary mahalynda “Gazprom” bilen Eýranyň milli nebit kompaniýasynyň (NIOC) arasynda Eýrandan Pakistanyň üsti bilen Hindistana gaz geçiriji gurmagyň tehniki-ykdysady esaslaryny (TYE) taýýarlamak barada ylalaşyk gazanyldy.
Eýran-Pakistan-Hindistan gaz geçirijisi TOPH gaz geçiriji proýektine basdaş bolup durýar.
