Az.R çe dınyo kosibə məmləkəton restədə ğəror qətəşe
Boku hokuməti rəsmiyon daima məmləkətədə əhali firəvanəti barzə səviyyə həxədə tarifinə qəpon jedən. Bı nezonədə Sər vəziri muavin Əli Həsənoviən votışe ki, ısət çəmə keşvərədə beçizə şəhrvandon cəmi 5% -e, 2020-minə sori ım 5% - ən həmə ərbob bəben. Əmo hokuməti rəsmiyon votəy bərəks, beynəlxalğə təşkilaton reytinqonədə, Azərbaycani Respublika daima orəxnə vıronədə ğəror qətedə.
Beynəlxalqə Valyuta Fondi bə dınyo devləton Umumdaxili Məhsuli həcmi muğayisə dair qıley siyahi elan kardəşe. Əqər ponə sori Az.R UDM bə har nəfəri 3956 dollar bıe, və bı siyahiədə 106-minə vırədə mandedəbebu, ımsor ım əmsal bə 3812 dollar eqıniə. Jıqo tənəzzuli nəticən əv bıə ki, Əliyevi kabineti rəhbərəti kardə məmləkət ımsor çe dınyo 20 qılə ən kosibə keşvəron arədə ğəror qətəşe.
Prezident Əliyevi dekabri 25-ədə deştə sərəncomi məmləkətədə minimum məvacibi məbləğ 14 mənot ziyod kardışe, bə 130 mənot rosnişe, ımən de ısətnə kursi 76 dollar təşkil kardedə. İğtisadşunas Zehrab İsmayıli bə "Azadlıq.info" votəşe ki, Əfğanıstanədən ısət minimum məvacib ım ğədəre. Jiqo vəziyyət bo bənə Azərbaycani de foydəninə kandemonə sərvəton qəncinə məmləkəti qıley faciəy. Kanadadə 1 saatinə koy məvacib 11 dollare. Yəni çəvrey fəhlə 1 rujədə çe Az.R fəhlə 1 manqnə məvacibisən vey zəhmətə həx ğəzənc kardedə.
Boku hokuməti rəsmiyon, məqəvuji, çe ım rəğəmonku xəbə nişone. Əks holədə, yəni qirəm xəbə hesteşonebu, ısətnə internetə əsrədə, har fərdi bemaneə informasiyon bə dast varde zınə vaxtədə bə şəhrıvandon jıqo dıvuon vote çı foydəş heste?
