Tehron Boku miyono həmmə tərəfinə əloğəon bə inkişofi tərəf hərəkət kardedə.
İroni prezident bə Tehron-Boku miyono 2 tərəfiyə muğaviləon icra karde təkidış ka.
Həsən Ruhani zinə Tehronədə de Azərbaycan Respublika milli məclesi rəis Oktay Əsədof vindemon karde votışe: İron və Azərbaycan Respublika rəsmi şəxson miyono nezə əloğə iyən həmkarion 2 qılə kişvəri miyono həmmə sahəonədə nezə bey bois bıə.
İroni prezident bə sənaye, dəvo-damon iyən elmi və texnoloqiya sahədə həmkarion zəminə işorəş karde və votışe: Kaspi dıyo enerji ehtiyatonku istifodə karde barədə bo mıştərəkə fəaliyəton çok və muhimmə ğəralon təsdiğ bıə ki bəpe rə icra bıbu.
Ruhani ijən bə məntəğə bıhranon de siyasi şivəon həl karde işorə və təkidış karde: Tehron karde bəzne bo jıqo bıhranon həl karde komək bıkə.
Azərbaycan Respublika milli məclesi sədr həm bə Tehron-Boku miyono ticari və iğtisodi baxşədə həmmə tərəfinə həmkarion inkişofi zərorət təkid və votışe: beynəl xalğ iyən məntəğə məsələon barədə xusosi çı hamsoyə kişvəron hakımiyət iyən ərazi təmamiyyətiku hioyədorəti karde barədə İroni nəzər və siyasəti bə ehtıromi loyiğ zınəş be.
Oktay Əsədev zinə ıştə ım səfəri cərəyonədə de İroni məclesi sədr Əli Laricani, İroni xarıci vəzir Muhəmməd Cəvad Zərif və İroni milli Əmniyyət Şura sərkatib Əli Şəmxani vindemonış karde.
