Boku hokuməti "kırı diplomatiya" iflas be

"Avropa Sabiləti Təşəbbüs" nominə təşkilat Az.R hokuməti "Kırı diplomatiya" siyasəti barədə ıştə dımiinə təhğiğati nəticon elan kardəşe. Bı tədğiğatədə Azərbaycan Parlamenti deputaton de Avropa vəzifədarə siyasətçion korrupsiya əlağon nişon doə bıə.

Bə hesabatədə votə bedə ki, Avropa Şura Parlament Assambleyadə İtaliya qrupi sədr Luka Volonte 2012-minə soriku tosə 2015- minə sori çe Azərbaycani deputatonku tosə 2milyon 500 həzo avro rışvə səşe ki, ım Şuradə Azərbaycani hokuməti tərəfo bəşəri hüğuğon darışte dair ğəror ğəbul karde imkan nıdo. Isət İtaliya prokurotura Luka Volonte bə məsuliyyət cəlb kardəşe. Volonte ım rışvəxorə fakton etiraf kardəşe və çe Azərbaycani kom deputatonku rışvə seşən bə qiy qətə. "Maidə. az" sayt nıvıştedə ki, həmonə deputaton Elxan Süleymanov və Müslüm Məmmədove.

"Avropa Stabiləti Təşəbbüs" təşkilat bə Süleymanov və Məmmədovi deputatəti xitam doe, AŞPA 2017 -minə sori yanvar sessiyadə Az.R nümayəndon sədo hüğuğiku məhrum karde təklif kardəşe. Çe Fransa, İspaniya, Almaniya prokuroronən ıştə məmləkəti deputaton de Azərbaycani əlağə fakton təhğiğ karde vacib be zınəşe.

Az.R AŞPA nümayəndon sədr Səməd Seyidovi im fakton inkar kardəşe votəşe ki, "çəmə devləti nüfuz və mevğe zümand bedə. Im çəmə bədxahon tərəfo bə çəmə əleyh qıley provakasiyey".

Elxan Süleymanov və Müslüm Məmmədov isə bə müxbiron sualon cəvob dodənin, bı barədə hələ ki hiç qıley fikir votəşon ni.