Pars Today

Suriya və İraği əraziədə terrorə DAİŞ-ə quruhi restədə canq kardə azərbayçanıjə şəhrıvandonən kam nıbin.

Bə kali mənbon məlumati nəzərən çəvon miğdar 7 həzo 500 nəfəro ibarət bıe. Suriya hokuməti ğıvvon və çey muttəfiğon bardə muvəffəğiyyətinə hərbiə əməliyyaton nəticədə həmonə terrorçion xeyli ğism tələf bıe. Isət çəvon ailə, məxsusən hırdənon faciəvi tale humanitar təşkilaton norohət kardedə.

Qıley azərbaycanıjə foto–jurnalist çe DAİŞ -ə ailəon Əl-hol duşərqahədə bıə, de azərbaycanıjə zənənon molağat barədşe, məlum bıə ki, əyo çe Az.R-ku 200 nəfər zənən heste. Çəvon xeyli hırdənonən dəvon i vırədə mandedən. “Qafqaz.ir” sayt bə Dini Təşkilaton dair Devlətə Komitə sədri muavin Səyavuş Heydərovi votəyon istinadən məlumat doşe ki, munağişə məntəğəonku bə vətən oqərdə 110 nəfər bə məsuliyyət cəlb bıə, 400 nəfəri şəhrıvandəti ləğv kardəşone, əvon həni bə vətən oqarde nibəzınen. Heydərovi DAİŞ-i restəonədə iştirak kardə azərbaycanıjə zənənon həxədən votəşe ki, çəvonədə çand kəs məhkum bıə, hətto edam bıəkəsonən hestin. Xeyli zənənon bə terrorçion bə şu şən, çəvonku evlad bə dınyo vardəşone, ısət çəvon şəhrıvandətiən ləğv karde məsələ muzakirə bedə.

İraği Xarici Koon Vəzarəti sıxanəvot Əhməd əl-Sahaf`i votəşe ki, bı rujonədə 112 nəfər azərbaycanıjə hırdən bə vətən vığandəşone. Umumən isə İrağiku bə muxtəlifə keşvəron 828 nəfər hırdən deport bıə.  Çəvonədə bə Az.R deport bıə hırdənon miğdar 248 nəfəre. Im hırdənon valideynon ya canqədə mardən, ya de məhkəmə hokmi edam və ya bə zindonə cəzo məhkum bıən. İraği məhkəmə bə Terrori Mubarizə Ğanuni 4-minə  maddə muvafiğ terrorədə taxsikor, təşkilatkor və ya bey maliyyə dastək doəkəson bə edam cəzo məhkum kardedə.