“Cəbhət -ən-Nusra” terroriston bə Az.R ərazi ki vardedə.

Tovuz rayoni de Ermənistoni marzədə vağeə bıə 4 rujnə hərbiə munağişə çe Az.R hakim dairədə xeyli ənuzon bə oşko bekardışe. Im devləti idarə kardə toyfə da soron dorozi bə reqioni xalqon və devləton əleyh bardə destruktiv , deşmenə millətçiə siyasət həm çey xarici aləmədə mevğeş zəif eğandə, həmən daxili ziddiyyəton bə qıvonə vəziyyət vardəşe.

Rusiyadə çe Tolışon diaspora təşkilati sədr İsmayıl Şabanov bə tolışon OTV internet televiziya kanali doə musahibədə ım məsəlon səpe ruşnə eğandəşe. Ey bo cəmiyyəti aqah kardəşe ki, Ğəfğazi devləton cəvon mustəğilətiku dəvardə ım 30 sorədə boştə xalğon bə qıley xəto peqardən. Bı səbəbən reqioni ğodrəton bəpe bə ım məsələ nəzarət bıkon ki, Ğəfğazədə asayiş və əmniyyət təmin bıbo. Tovuzi marzədə hərbiə munağişə nişon doşe ki, Az.R-ədə proseson İlham Əliyevi ne, kənoə ğıvvon tərəfo idarə bedə. Qirəm ım dı qılə devləton arədə canq bino bıbo, co devlətonən bı prosesi mudaxilə bəkarden. Türkiyə hətto ım oj-oşko bəyon kardışe.

Haliyədə dınyo qlobal siyasətədə rəğabət bardə ğodrəton nəzər bə Ğəfğazi cəlb bıə. Xəbə heste ki,  “Cəbhət-ən-Nusra”terrorciə dastəon bə Ğəfğaz ovoştınidən. Nə İron , nə Rusiya bımi biqonə mande nibəzıne. Çunki ım hadisəon NATO bloki Ğəfğazədə huzuri bərğəror bıe ehtiva kardedə.   Qirəm “ən-Nusra” terroriston Az.R-i siyasətədə iştirakşon bıbo, bəvədə tolıon ce İron və Rusiya tərəfədə bənə muttəfiği bə terrorizmi əleyh mubarizədə işrirak bəkarden. İsmayıl Şabanovi ımən ğeyd kardəşe ki, “əmə məzlumimon, Xıdəvandi-aləmən çe məzlumon tərəfədəy”.

Sionist rejimi hokuməti sərdariən vaxt hestbe bə Əliyevi quş ehandəşbe ki,  Azərbaycan bəvon bo nati qorə ne, de İroni həmmarz bıe qorə lozime. Bənə ım fakti təsdıği dəvardə rujonədə “The Jerusalem post” rujnomə bə Boku rejimi əleyh qıley təhliliə məğalə bə əhandon edoştışe, bəştə hokuməti təklif doşe ki, de Az.R ıştə munasibəton sərf-nəzər bıkardo.