Muxalifon bo Paşiniyani istifo doe faxt təyin kardışone.

Ermənistoni paytəxtədə bıə Muxalifon bo i minnə vəziri istifo doe faxt təyin iyən elan kardışone ki Paşiniyan bəpe tosə 3 şambə ıştə vırəku bə kəno bımando.

Bə Təsnim aqentiyəti raporti əsos, Ermənistoni parlamentədə bıə muxalif partiya nəmayəndəon, ıştə zinə ruji eterazonədə rəsmən təhdid kardışone ki əqər paşiniyan tosə təyin bıə faxti istifo nıdo, Ermənistoni həmmə vırəonədə iştimayi benəzmi icod bəkan.

Ermənistonədə eteraz aksiyaon bə zəmon bino bıə ki millət Ğrəboği barədə tojə imzo bıə sul muğavilə bə kişvər xəyonət kardə sazışi unvan bə hisob vardışone ki Paşiniyan bəştə nəzə əsos əy de Putin və Əliyevi imzoş kardə.

Və hol ım ki Paşiniyan bəyonış kardə ki bə ım muğavilə ğəbul karde məcbur mandə be və həni co rooş nıbe.

Ğərəboği canqədə Ermənistoni ərtışi məğlubiyətiku tosə bə ısət Nikol Paşiniyani dıvləti istifo tələbon dəvom kardedə iyən 17 qılə muxalif partiya rəsmən dıvləti bə kəno mande iyən tojə i minnə vəziri vıjniye pidəşone.

Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.