Ruhani: İron de Azərbaycan Respublika əloğəon inkişof doeyış pidə.
İron İslam Respublika prezident Tehron-Boko miyono bıə əloğəonış çok və bənə bıvəti bıə rabitə bə hisobış varde.
Həsən Ruhani zinə Tehronədə de Azərbaycan Respublika xarıci vəzir Ceyhun Bayramovi vindemoni cərəyonədə bə Ğərəboği mınoğişə barədə İroni ojə-oşkorə nəzəron işarəş karde və tojə ərazi ozodəti iyən otəş bastiku ıştə rizoyəti elanış karde.
Ruhani bə İron iyən Azərbaycan Respublika sərhəddonku iğtisodi-ticari əloğəonro istifodə karde zəruriyyati barədə votışe: Ğərəboği tojə ozod bıə ərazi obdon karde poryektonədə İroni işterok bə har 2 qılə kişvəri mənafe bəbe.
İron İslam Respublika prezident bə Tehron-Boko miyono imzo bıə nakonə sazişon əcomlə Rəşt-Ostoro osonə ro loihə işarə və bə ım poryekti əməliyoti icra təkidış karde.
Ruhani əlovəş karde: İron iyən Azərbaycan Respublika miyono bıə məıştərək poryekton əcumlə Xodafərin sədd ya xot stansiyaon soxteyro şərayet hozzı bıə və 2 qılə kişvər karde bəznın, ıştə əloğəon sənaye, elmi, dəvo-damon soxte və co baxşonədə həm harzəmoniku vey hevuj kon.
Azərbaycan Respublika xarıci vəzir Ceyhun Bayramov həm Ğərəboği mınoğişə barədə Azərbaycan Respublika ərazi təmamiyyətiku himoyədorətion bə təğdiri loiğ bə hisobış varde və votışe: 2 qılə kişvəri miyono bıə sərhəddon çı dustiyəti və inkişofi marze və ısət de tojə ozod bıə məntəğəon zərfiyəton xususi İroni sərhəddon nezi karde bəbe tojə həmkari zəminəon icod ko.
Əv Rəşt-Ostoro osonə ro komil bey de İron İslam Respublika ticari əloğəon inkişof doe amil bə hisobış varde və de umidvarəti ibroz karde votışe: de tojə beynəl-xalğ şərayeti və mıvcudə maneon ki Amerka sanksiyaon miyoniku barde vositə icod bəbe mıştərək poryekt-loyehəon həm rə icra bıbu.
Ceyhun Bayramov həmçenin, İroni ətomiyə alim, Şəhid Muhsin Fəxrizodə terrori məhkum və təkidış karde: qıləy elmi alimi terror hiç faxt ğəbul kardənin ni.
