Ğərəboğədə Azərbaycan Respublika tojə əməliyaton, 4 qılə hərbi kıştə bıən.
Azərbaycan Respublika mudafiə vəzarətxonə dıvlət əmniyəti idarə de bəyaniyə vositə Ğərəboği qıləy dionədə tojə hərbi əməliyaton dəvoniyeyku xəbəş do.
Bərəsə xəbəron əsosi, ım bəyaniyədə ğeyd bıə ki otəş basti ima bey bəpeşt ijən Erməni kali hərbiçion Hadrot nomo bıə di şimol ğərb vişəonədə hestin ki xərabkaranə koon və bə Azəei hərbiçion zidd həmləon əncom dodən.
Azərbaycan Respublika mudafiya vəzarətxonə təkidış karde ki Erməni təcavuzkarə hərbiçion həminə məntəğədə tosə bə ısət 4 nəfər çı Azəri hərbiçion kıştəşone iyən 2 qılə co hərbi və 2 nəfər həm ğeyri hərbi zəxmin bıən.
Tojədən Azərbaycan Respublika mudafiya vəzarətxonə de bəyaniyə voditə bə Ermənistan nota doəş be ki Ğərəboğədə sulh muğavilə tam icra ko iyən harcurnə təhrikəkə hərəkətiku bə kəno bımando.
Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.
Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.
Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.
