Musəvi: Ğərəboği obdonəkə koon bo Tehron-Boku əloğəonro qıləy fırsəte.

Azərbaycan Respublikaədə bıə İroni səfir Tehron-Boku miyono bıə 2tərəfi iğtisodi əloğəon bənə siyasi həmkarion inkişofi tələbış karde və votışe: Ğərəboği obdonəkə planon bo ım məsələ qıləy erjinə fırsəte.

Bə İrna raporti əsos, Azərbaycan Respublikaədə bıə İroni səfir seyd Əbbas Musəvi votışe: Ğərəboği tojə canqədə İroni məvğiyət qəte bəpeşt, ısət əloğəon bə tojə mərhələ varid bıə ki ım səthədə bıə həmkari karde bəzne Ğərəboği canqi nəticədə zion vində məntəğəon obdon karde meydon və loihəonədə vey komək bıko.

Musəvi bə Ğərəboği obdon karde planonədə Azərbaycan Respublika 10 milyard dolar sərmoyə noe ki tosə 5 sori mıddət bəpe əncom bıbu işarəş karde iyən izhorış ka: Boku dıvlət fəğət ımsor 2 milyard dollar Ğərəboği loihəonədə sərmoyə noeş pidə.

Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.