Bə İron İslam Respublika inğilobi səbarzəti 42-ə sorəqardışi xoto Ermənistoni prezidenti vığandə mesaj.
Ermənistoni prezident, de qıləy vığandə mesaji vositə İron İslam Respublika inğilobi səbarzəti 42-ə sorəqardışi bə İroni Yolə Rəhbər və prezident təbrik votışe.
Bə İrib raporti əsos, Armen Serkisiyan ın təbrik mesajədə Fəcri Darujon iyən İron İslam Respublika inğilobi səbarzəti 42-ə sorəqardışi bə İroni Yolə Rəhbəri və Həsən Ruhani təbrik votışe və 2 qılə kişvəri miyono bıə ğədimi və kanə dustiyətion milləton miyono bıə əloğəon stabil iyən qarantiya əkə amil bə hisobış varde.
Serkisiyan əlovəş karde ki ısətnə bə vucud omə şərayeti jintonədə har rujiku vey həmkarion əhəmmiyət doe əhəmmiyətış heste.
42 sor çımi bə nav Hecri Şəmsi 1357 nə sori Bəhmənə manqi 12ədə bərobər de 1979 nə sori Fevrali 1 İroni islamiyə inğilabi təsis əkə Mərhum İmom Xomeyni(r) 15 sor vətəniku ixroc və dər bədər bey bəpeştə de İroni milləti əzəmətinə pişvozi bə Tehron varid be.
10 ruj ım daxıl bey bəpeştə yəni Bəhmənə manqi 22ədə(Fevrali 11) İroni əzəmətinə inğilab həm rəsmən səbarzbe.
Bə həminə mınosibəti xoto Bəhmənə manqi 12ku detosə 22, yəni bo 10 ruji mıddət İronədə vey məxsusə bərnoməon de Fəcri darujon onvani bərpo bıə.
Əmmo ımsor bənə həmməy bə ico qırdə bıə mərosimon ki Korona virusi xoto muhdudiyətonış be, Fəcri Darujon həmməy məxsusə bərnamon həm de səhiyyəvi porotokolon rioyəti dəvoniyə be.
