Postsovet məkanədə çe infilyasiya ən barzə rəğəm Az.R-ədəy

Mustəğilə Devləton İbemoni – yəni postsovetə məkani devləton Statistika Təşkilati ımsornə çətvəri infilyasiya rəğəmon elan kardəşe. Bə həmonə məlumati əsasən Az.R -ədə istehlakə ğıyməton həmonə keşvəronədə miyonə infilyasiya rəğəmisə 2,3 ğat barz bıə

İğtasadşunason çimi səbəbi sori əvvəliku Respublikadə sutemoni ğıyməti 11 faiz, ovi ğıyməti 100 faiz boho beku vindedən. Haliyədə keşvəri istehlakə vıjorədə ərzaği ğıymət 15 faiziku tosə 40 faiz ziyod bıə.

“Teref.az” sayti çe ekspert Nemət Əliyevi fikr bə əhandon rosniəşe. Ey votəşe ki, bə bohoçiəti təsir kardə səbəbon, əsasən çe Kemrukə Komitə ıştənbəsəti, Vəziron Kabineti verqi rusumi xeyli dərəcədə barz karde, monopolizm, korrupsiya, bevəcə usuli idarəy.  MDİ Statistika Təşkilati nişon doə rəğəm Azərbaycanədə real vəziyyəti bə oşko bekardedə. Əmo hokumət de bə əhali çəşi xok pu karde məşğule. Çunki Respublika Devlətə Statistika Komitə məlumat dodə ki, bə keşvər idxal bıə məhsulon ğıymət 27 faiz ros bıə. Ço qıley məlumatədə isə iddia kardedə ki, keşvəri vıjoronədə ərzaği ğıymət 4,7 faiz boho bıə. Əqər bə nəzər bısənəmon ki, keşvərədə istehlak bıə ərzaği 60 faiz çe xarico idxal bedə, və çəvon ğıyməton de miyonə hisobi 27 faiz vey bıə, jəqo daxili vıjoronədə ərzaği ğıyməti ziyodbemon  4 faiz ne, kamiku 15-17 faizi ğədərədə bənine. Nemət Əliyev ımiən proqnoz dodə ki, jıqoşən ərzaği ğıyməton boho bıe çəş kardə bedə.

Respubluka Devlətə Statistika Komitə elan kardə rəğəmonku ımən məlum bedə ki, bə dəvardə sori ım çətvəri nisbətədə əhali realə mədaxil 1,6 faiz kam bıə. Demiən əhali sosial vəziyyəti bə dəvardə sori nisbətən çanədə qıvonin bıe oşko vində bedə.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.