Bəğayi:İron çı harcurnə şərə hərəkət iyən təhdidi vədə boştəni mıdofiyəro hozzıye

İroni İslomi Respublikə xarici koon vəzirəti sıxanəvot bə harcurnə şərə hərəkət iyən təhdidi vədə boştəni mıdofiyəro hozzıəti təkidış kardə.

Bə Pars-Tudey doə məlumoti əsos,İroni İslomi Respublikə xarici koon vəzirəti sıxanəvot İsmoyl Bəğayi bə qıləy jurnalsiti çe Pokıstoni xarici koon vəzir iyən iminə vəziri mıovin Muhəmməd İshoğdori çe İron iyən amerkəku bo Fərvərdinə manqi 19-ə ruji otəşvəsi vaxti dıroz kardey barədə bıə tələbi həxədə bıə cəvobədə,bo tətğıği canqi bə oxo rosney iyən məntəğədə sulhi bərpo kardey koyədə çe Pokıstoni vositəçi roli ifo kardeyədə bıə çokə cəhdonku ğədrdonəti kardə holədə,bə yodışon dənoe:İroni İslomi Respublikə təhmili canqi binoəkə bıəni və çe İroni hərəkəton həmmə amerkə iyən sehyonsit rejimi hərbi təcovuzi vədə ıştəni ğanuni surətədə bıə mıdofiyəroye.Əy əlovəş kardə:Bəçımi əsos,İroni İslomi Respublikə hərbi məydon iyən siyosi arenədə dəğiğə rəsədon və nəzorəton əsos,bo İroni milli əmniyyət iyən mənafe mıhofizəro lozım bıə tədbironış vində iyən İroni silohinə ğıvvon həm de ğətiyyəti iyən harətəfinə komilə surətədə bıə hozzıəti,çe harcurnə şərə hərəkət iyən təhdidi vədə bəmandeyn iyən bəvon cəvob bədon.