Tərəvəz məhsulon ixracədə problem bə əməl omə.

Haliyədə Azərbaycanə Respublika dionədə tərəvəzə məhsulon çınie tiğonə vaxte. Fermerə təsərrufaton ıştə perosniə məhsulon bə Rusiya ixrac kardeədə de yolə mışğılon vəbəvə mandən

Orəxnə həftədə keşvəri Mass-media Şəmkiri, Qeyçayi pamədorəvonon , Cəlilobodi kərtofəvonon muraciəton həxədə məlumaton pevolo kardəşone. Sputnik Azərbaycan sayti muxbir Qeyçay rayoni Ləkçiplaq di fermeron etirazə aksiyadə bıə. Əyo fermeron bey votəşone ki, dəvardə soron əvon ıştə perosniə məhsuli de vağonon bə Rusiya əvığandin. Imsornəku bokırniə avtomobilon ım koy icra kardedən. Çəvon dəro kardə maşinon 10-15 ruj Samur marz ovaştə məntəğədə mande məcbur bedən. Fermer Elman Mirzəliyevi qəp jəşe ki, karantinədə vəyə və yas məclison dəvunie ğədəğən karde daxili vıjorış okıştə. Həmən ponə sori avtomobilon məhsuli bə Rusiya bə 1500 dollar bardedəbin, ımsor bə 4 həzo dollar ros kardəşone. Rusiya marzədə ım curə problem qirəm dəvom bıko, bəvədə fermeron tamam bankrot bəben.

Eyən vote bə vırə eqınidə ki, Azərbaycan bə Rusiya pomidor idxal kardə devləton arədə iminə vırədəy. 2019-minə sori çiyo bə Rusiya 172 həzo ton pamədor idxalşon kardəbe.

Jıqo mışğıli Cəlilobodi kərtofəvononşən girinc kardə. Əvon bə Milli Məclisi deputat Elman Nəsirovi muraciət kardəşone. Nəsiroviən parlamenti iclasədə ım məsələ barədə ehandəşe. Ey kemrukə məmuron dəvət kardəşe ki, ğıssə muddətədə tərəvəz kırniə avtomobilon çe marziku ovoştınie məsələ həll bıkon ki, məhsulon bıdə poymol nıbon.

Devlətə Kemrukə Komitə və Di Təsərrufat Vəzarəti rəsmiyon ım problemi ənətəxir həll karde barədə bə ictimaiyyəti xəbə rosniəşone. Kemrikə Komitə həmkari izah kardəşe ki, Azərbaycani tərəf befasilə ko kardedə, sutkədə 300 qılə maşini bə Rusiya ovoştınidə. Əmo Rusiya tərəf i sutkədə anğədər avtomobili təftiş karde imkanədə ni. Bı səbəbən Azərbaycani tərəf sutkədə sərhədi ovaştə maşinon miğdari vey karde zınedəni. Ey ımən votəşe ki, haliyədə de Rusiya tərəfi molağaton bardedən ki, təcili ğaydədə avtomobilon bə Rusiya dəro bıkardon ki, məhsulon zay nıbon.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.