İİR de Az.R marzədə tojə pard inşa bəkarden
İron İslamə Respublika de Azərbaycani marzədə - çe Ostoro ruy səpe tojə pard inşa bəkarde. Im, İroni Ro və Şəhərinşa vəzir Məhəmməd Eslami de Az.R Sər Vəziri muavin Şahin Mustafayevi dəbastə həmkarəti məramnomədə nəzərədə qətəşone
Çe Maide.az bə İRNA istinadən doə xəbədə votə bedə ki, ım layihə molyət 4 tam dadə 7 milyon yevro ğədərədə bənine, və bə 1 sor inşa bəbe. Tərəfon ım xarc nima-nim, yəni har tərəf 50 faiz, bəştə ehdə peqətəşone. Mustafayevi ğeyd kardəşe ki, pardi dutə bəpeş İronədə istehsal bıə məhsulon bə Az.R, Rusiya və diqər hamsuə devləton kırnieədə əhəmiyyətinə imkanon bə əməl bome, reqionədə tranzitə imkanon həniən hevuj bəbe. Həmən bokırniə avtomobilon miğdarədə sıftiəti dərəcə saru ebəğande, çəvon çe sərhəd və kemrukiku rə ovoştıne imkani təmin bəkarde.
Im dı qılə keşvəri ıştə arədə osınə ro nəğliyyati inkişaf kardovnieədən marağ hestışe. Bə ım məsələ dair İroni Osınə ro Şirkəti direktor Səid Rəsuli və Azərbaycani Osınə Ro Ojə Səhmdarə Cəmiyyəti sədr Cavid Ğurbanovi məromnomə ğəbul kardəşone. Bə ım sənədi əsasən, 2 qılə keşvəri arədə de osınə roy kırniə boon həcm bə 2 milyon ton rəsənine. Dəvardə sori , diə məkəmon ki, de koronavirusə pandemiya əlağədar məhdudiyyəton hestbin, İroni de Az.R arədə kırniə tranzitə bo 18 faiz ziyod bıə, bə 480 həzo ton rəsə.
Tərəfon həmən ğeyd kardəşone ki, Ğəzvin – Rəşt – Ostoro osınə ro “Şimal-Cənub” Beynəlxalğə Nəğliyyatə xətti əsasə vəsiləy. Çey Ğəzvin – Rəşt hissə 2 sore ki, bə istifadə doəşone. Rəşt- Ostoro hissədə inşaatə ko dəvom kardedə. Im vəsilən bə ko dəşə bə peş dı qılə keşvəri arədə tranzitə bo kırnie çand bəjəm ziyod bəbe. İğtisadşunas Borhan Mahmudi ıştə təhlili məğalədə ki, “mehrnews.com” və “İran.ru” saytonədə dərc bıə, ğeyd kardəşe ki, “Şimal-Cənub” nəğliyyatə koridor çe Hindistoniku tosə Rusiya həmə Ğəfğaz, Miyonə Asiya, hətto Cənubi-Şərği Asiya məmləkəton arədə nəğliyyatə əlağə təmin karde ro çokə nikan bə əməl bəvarde. Hələ 2015-minə sori Az.R hokuməti ım proyektədə iştirak, və Rəşt – Ostoro osınə roy inşa ro 500 milyon dollar maliyyə co karde bə ehdə peqətəşbe. Təəssuf bıbo ki, tosə ısət Boku hokuməti ım məbləğ avjor kardəşni, yəğin ki, ıştə ım ğəror ləğv kardəşe.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
