Ekoloqiya problemon

Əhali məişətədə bə əməl omə xəşəlon şe-şe bə qıley problem peqardedə. Xususən orəxnə da soronədə məişətədə plastik , penoplast, polietilen məmulaton istifadə hevuj bıe, əvoni bə təkrar emal vığande zərurət bə meydon vardəşe

Çunki çe ım kimyəvi məmulaton təbiətədə vajiə proses çand 100 soron əhatə kardedə, qirəm hokumət çəvon təkrar emali təşkil nıkardo, bəvədə har qıley şəhəri ətrofədə nəhənq zibilə tayə bə əməl bome , çey həm bə ətrofə muhiti , həmən bə insonon səhhəti xeyli ziyanış bəbe. Bə Azərbaycani Devlətə Statistika Komitə elan kardə rəğəmon əsasən Boku şəhəri har qıley sakin har sor 350 kilo məişətə xəşəl bə əməl vardedə. Və ım rəğəm sorbəsor ziyod bedə.

Sputnik Azərbaycan sayt nıvıştedə ki, Boku şəhəri hokumət 2 sore ki, şəhəri əjion arədə məişətə xəşəlon cobəco karde təbliğati bardedə. Şəhəri məhəllon xəşəlxonəonədə zibili bə nevon co karde, bımi ro təyin bıə bə muxtəlif ranqinə konteyneron şodoe, xəşəli emali hoson və effektin kardənine. Məişətə xəşəlon emali ekoloji problemi musbət həll karde roədə yolə əhəmiyyətış heste. Əmo çe paytaxti ətrofə məntəğəonədə ekologiya problem hələən həll bıə ni. Jəqo məntəğono qıley Binəğədi ğəsəbəy. Çey həndəvərədə qıley xıl heste. Əhali ıştə məişətə xəşəlon bə həmonə xıl şododə, kanalizasiya ovonən bə ım xıl erutə bedə. Çəvrey sakin Niyaməddin Məmmədovi bo Meydan TV nəğıl kardəşe ki, çey kə çe ım xıli kənoədəy. Bələdiyyə diədə qıley konteyner nodəni ki, camaat xəşəli əyo ekə. Əve ım xıliku bənə xəşəlxonə istifadə kardedə. Ğəsəbədə kanalizasiya xətti nıbeyən bey səbəb bedə ki, məişəti çırkovon bə ım xıl ru bedə. Isət çe xıli buəvuləku nəfəs kəşe mumkun ni. Əhali jimonən bə cəhənnım peqardə.

Ekspert Natiğ Cəfərli fikir jıqoe ki, bə ekoloqiya tənəvəc mande ro həmən bə atmosferi sofiətiən diğğət doe lozime. Bımi ro hokumət məmləkətədə elektro avtomobilon istismari ro şəraiti bəpe hevuj bıkardo. Avropadə elektromobilon miğdar sorbəsor ziyod bedə . Azərbaycanədə isə dəvardə sori bə keşvər 81 qılə jıqo avtomobil vardəşobe, ımsori 5 manqədə çəvon ədəd cəmi 29 qılə bıə. Cəfərli ımən votəşe ki, hokumət daima “havzə iğtisadiyyat” onone barədə təbliğat bardedə, əmo de jıqo ələvuşə, çəşdəğılə kemrukə siyasəti, həmən de jıqo kanə təfəkkuri ım sistemi ekoloqiyan hejo çırkin bəmande.

İbrimi Zahirəddin, Çe Rusiya Yekaterinburğ şəhəriku. İİR sədo, tolışi radio.