Bə İcbari tibbi sığorta çı cur əməl kardedən

Imsori aprelə manqi 1-minə rujiku Az.R həmə əraziədə icbari tibbi sığorta tətbiğ bino bıə. Bə ım proqrami 2550 nevədə tibbi xidmətonku bepul istifadə karde imkan daxile

Əmo hələən əhaliku bə ım ğaydəon əməl nıbe, mərizxonəonədə çəvonku pul tələb bıe həxədə şikayəton omedən. “Xəbərdar TV” Qeranboy rayoni sakin İbrahimov Alimiku həmonə rayoni mərkəzi mərizxonədə bo UZİ xidməti ro 17 mənot pul tələb karde fakt bə oşko bekardəşe. Boku sakin Vəli Ğuliyevi bo Azadi Radio Respublika Kilinik Mərizxonədə bə icbari tibbi sığorta şərton əməl nıbe barədə qəp jəşe. “Azadlıq.info” sayt çe Ostoro şəhrestoni Arçon ğəsəbə sakin Vağif Məmmədovi noroziəti barədə nıvıştəşe. Məmmədovi piəşe ki, çe UZİ-ku , yəni Ultra Sədo Tədğiğiku dəvardo, həmən analiz bıdo, bey votəşone ki, ım xidməton de pulie. Isət ey pidəşe de ıştə çəşi mərəzi əlağədar  bə mərizxonə muraciət bıkardo, əmo tarsedə ki, bo ım mualicə roən çeyku pul tələb bıkon. Hərcənd ki, çey məvacibo har manq bo icbari tibbi sığorta 12 mənot pul qətedən. Ostoro co qıley əji bo muxbiri qəp jəşe ki, sərhədi oj bıe bə çəşe ki, bo mualicə ro bə İron bışo.

Ostoro rayoni mərkəzi mərizxonə sər doktor Oqtay Əmənullayev isə votedə ki, xidməton i ğism de pulie, əmo həmə de pul ni. Məsələn, saleməti həxədə arayış bə 15 mənot, bo şoferəti vəsiğə se ro arayişi devlətə rusum isə 30 mənote. Əmənullayevi ımən ğeyd kardəşe ki, şəhrıvandi mualicə kardə doktori əv bə UZİ vığandəşebu, bəvədə ım xidmət həvoye. Ne, əqər şəhrıvand deştə təşəbbusi çe ım xidmətiku istifadə karde pidəşebu, bəvədə bəpe əv bımi ro pul avjor bıkardo.

Adi doktoronən icbari tibbi sığortaku norozin.  Çəvon kali mutəxəssison manqə məvacib cəmi 300 mənote. Imən çəvon maddi tələbati təmin kardedəni. Bə icbari tibbi sığorta şərton əsasən bə xidmət nişon doə mərizon miğdari muvafiğ bəpe bə doktoron məvacibi məbləğ əlavə bıkardon. Əmo tosə ısət bəvon jəqo əlavə məbləğ avjor kardəşon ni.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.