Sumğayıt şəhərədə ekoloji problem.

Xeyli vaxte ki, şom eğıniə bəpeş Sumğayıt şəhəri duəvulə və qonə bu eqətedə. Şəhəri əjion çand kərə bə İcra hakimiyyəti şikat kardəşone.

Eko-fəalon hətto şəhəri hakimiyyəti bina vədə etirazə aksiyaonən dəvuniəşone. Əmo ım problem hələən həll bıəni. Ekoloqiya fəalon votedən ki, şəhərədə buəvulə şəvi dırozi tosə subhi vaxti dəvom kardedə. Jıqo  vəziyyət, bo əhali saleməti xəto, muxtəlifə mərəzon bə əməl varde bəzıne. Ekoloqiya və Təbii Sərvəton Vəzarəti həmkaron de eko-fəalon bə şəhəri Texnoloqiya Parki, iyən Kimya Sənaye Parki nəzər səğandəşone. İğtisadiyyatə Vəzarətiku bəvon, həmən bə BBC Azərbaycani cəvob doəşone ki, ım parkonədə fəaliyyət nişon doə zavodon bə ekoloji muhafizə tələbon muvafiğ ko kardedən, çəvon duəvul beşə trubon həmə de filtron təmin bıən və bə muasirə tələbon cəvob dodən.

Bə Sputnik Azərbaycani doə xəbə əsasən, Devlətə Ekoloji Əmniyyətə Xidməti rəis Hikmət Əlizadə məlumat doəşe ki, “Baku Non Ferrous and Foundry Company” muəssisə ki, Sumğayıt Kimya Sənaye Parkədə fəaliyyət nişon dodə, və Hacı Zaynalabdin Tağıyev ğəsəbədə məskun bıə ruən istehsal kardə zavodonədə çəvon bardə monitorinqi nəticədə ım zavodon bə atmosfer nornaku ziyod hidroqen-sulfid vadoe muəyyən bıə. Im muəssisəon 10 həzo mənotiku tosə 12 həzo mənot cərimə karde barədə sənədon bə məhkəmə vığandəşone. Əlizadə Sumğayıti həvosati xərob kardeədə şəhəri məişətə xəşəlon idarə kardə poliqon əsasə qınokar zınəşe. Votəşe ki, dəvardə soronədə həmonə muəssisə çand kərə cərimə kardəşone. Bı rujonədə əyo şanqo dəvuniə monitorinqi nişon doşe ki, çe əyo bə həvo daxil bıə karbonə ğaz və hidroqen-sulfid normasən xeyli veye, bə səbəbən bə şəhəri ərazi jıqo yavə bu pevolo bedə. Im problemi həlli i qılə ro hestışe ki, əvən Sumğayıtədə bə muasirə tələbon muvafiğ xəşəli emal kardə zavodi inşa kardeye.

Səhəri İcra Hakimiyyətiku votəşone ki, əvon jəqo qıley zavodi inşa karde ro lazımi sənəd və layihəon hozo kardəşone və bə muvafiğə devlətə təşkilaton rosniəşone.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.