Ostoro rayoni Sım diədə tarixi ğədimə rizon.
Sım qıley diye ki, çe Ostoro rayoni bandə əraziədə ğəror qətəşe. Çıvrey təbiət xeyli qəncine. Bə səbəbən ım ərazi hələ çe miladi eraku bə nav insonon tərəfo məskun bıə
Talıb Salayev ım diy sakine. 75 sinn hestışe, dıroz muddət diədə doktor ko kardəşe. Bo “Sputnik Azərbaycan” sayti muxbiri qəp jəşe ki, çe Sım diy ğədimiəti subut kardə xeyli dəlilon hestin. Hejo “Sım” nomi ıştən, və ya diy əraziədə Uti nominə meydon, ki ğədim vaxtonədə əyo pəhlivonon dəçıkinıbən, diy ğədiməti nışononin. Doktor Talıb`i ıştə bobonku məsə qıley etimoloqiya barədən votəşe ki, “əmə ıştə yolonku məsəmone, bı ərazionədə Sam nominə toyfə jimon kardəşe. Imən bə Firdovsi “Şahnamə” eposi ğəhrəman Rustəm Zali zoə Sam`i əvlodon bıe qıley işarəy. Peşo Sam nom bə Sım peqardə.
Diy məktəbi tarix muəllim Nəbi Xalığovən əlavə kardəşe ki, diy əraziədə bə Sasanion devri dair maddi-mədəni numunəon peydo bıən. Rəvayət heste ki, diy həndəvərədə 7 qılə ovə dinq, yəni osyo mevcud bıə. Tosə ısət çəvon 5 qılə vırə muəyyən bıə, mandəyonşon bə oşko bekardə.
Bı ərazionədə piron ğəror qətə vırəon mevcudin. Əyo pilləkəninə ğəbən heste ki, votedən, əv bə İbrahim peyğəmbəri devri aide. Diy ətrofədə 12 qılə ğədimə qəbıston mevcude. Əyo curi ğəbi sığon hestin ki, hevujiş 1 metr, dıroziş 2 metre. Kali sığon səpe mexi nıvıştəyon hestin, ki ımən əvoni dee bə Haxamanişinon devri, yəni kamiku bə 2300 sor bə navnə zəmonə aid kardedə.
Nəbi muəllimi həmən izah kardəşe ki, əv ıştən çe Şah İsmayıli nəslikuy. Çey ənkə-bobo Mir Baba Həmzə 14-minə əsrədə jiə, çe Şeyx Səfiəddini zomo bıə. Çey vələd əvlodono Şeyx Mir Abbas və Şeyx Nəsrullahi ğəbon Sımi hamsuə di- Sibbiyətədəy. Əvon ıştə vaxtonədə yolə dini alimono bıən, əhali çəvon ğəbon tosə ısət har sor bənə ocəği ziyarət kardedə. Ostoro rayoni rəhbəriyyəti tərəfo çəvon turbəon bərpo kardə bıə. Im turbəon ısətən bo ətrofə dion sakinon muğəddəsə ziyarətqohe.
İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.
