Az.R məhbəsonədə məhbuson boçi ğiyam kardedən

Har qıley məmləkəti jimonədə mevcud bıə problemon bə çey cəmiyyəti həmə vəsilon təsir kardedə. Az.R -ədə şəhrvandon quzərani qıvonin bıe, vəzifədaron ıştənbəsəti, çəvon bə əhali kardə zülm dee məmləkəti məhbəsonədən ıştəni biruz dodə.

Boku Nizami rayoni Yolə Şor ğəsəbə nezi 1 numrəninə məhbəsə koloniya heste. Yanvari 22 -minə ruji əyo məhbuson ğiyam kardəşone. Bə vırə Daxili ləşkəri hissə vardəşone ki, ım ğiyami bıhıtvonon. Bi barədə bə "Azadlıq radio" müxbiri ım hadisə şoydon məlumat doəşone. Penitensiar Xidməti İdarə mətbuat şebə rəisi bə ım radio moxbiri parsi cəvobədə ım xəbə təkzib kardəşe. "Azadlıq.info" nıvıştedə ki, bı koloniyadə  nəzarətçion rışvəxorəti, bə məhbuson doə hardəy keyfiyyəti saru be bə ım ğiyami səbəb bıə. Məhbuson nezə odəmon votedən ki, məsələn, sovğati bə ıştə odəmi dəvunie ro nəzarətçion çəvonku 100 mənot rışvə tələb kardedən. Bə məhbuson doə xorəkon i qlə "kaşa"də ibarəte. Koloniya dukononədə ğıyməton çe kənoə ğıymətonsə 2 kərə bohoe.

2012 -minə sori sentyabri 9-ədə və 2014-minə sori dekabri 22-ədə 14 numrəninə koloniyadə məhbuson 2 kərə ğiyam kardəşonbe. Har səfən ım ğiyamon səbəb bənə ısətnə ğiyami, nəzarətçion rışvəxorəti, xorəki keyfiyyəti saru be, koloniya rəhbəriyyəti ıştənbəsəti bıə.

Yanvari 22-minə ruji ğiyam və ey çe Penitensiar Xidməti İdarə tərəfo təkzib be nişon dodə ki, Boku hokuməti məhbəsə koloniyonədə bə ğeyri-ğanuniə hərəkəton orəx doe hiç qıley əzm nişe. Umumən cəmiyyətədə ım cürə hərcı-mərcə vəziyyət məvuji bə çey siyasəti qıley norma peqardə.