10 nəfər Erməni hərbi əsir Azərbaycan Respublika tərəfo ozod bıə.
Aəzrbaycan Respublika 10 nəfər Ğərəboği tojə daveon cərəyonədə əsir bıə Erməni hərbionış ozod karde.
Bə Fars aqentiyəti raporti əsos, ımon Dekabrə manqi 14 ədə Azərbaycan Respublika prezident İlhom Əliyev, Ermənistoni i minnə vəzir Nikol Paşiniyan və Avropa şura rəis Şarl Mişeli miyono bıə 3 tərəfi iclosi cərəyonədə təvafuği nəticədə ozod bıən.
In iclos tojədən Brusselədə bərpo bıə.
Azərbaycan Respublika tərəfo Erməni əsiron ozodəti qıləy şəroyetədə əncom bıdə ki Suçiədə Azərbaycan Respublika, Erməniston iyən Rusiyə rəsmi şəxson miyono 3 tərəfi iclos və Brusselədə tojə muzakirəon bəpeşt 2 qılə kişvəri miyono daveon iyən sərhəd ixtilafon dəvom kardeydə.
Ğeyd kəmon ki Brussel iclosədə Avropa i bemoni şura yol Şarl Mişeli co bə co de Nikol Paşiniyan və İlham Əliyevi vindımonış karde.
Dəvardə sori Oktiyabrə manqədə Azərbaycan Respublika vey hevuj iyən həmmə tərəfinə əməliyati bo Ğərəboği məntəğəku Ermənion xaric karde və işğal bıə ərazi ozodəti xoto bino kardışone.
Azərbaycan Respublika 44 ruj canqi bəpeşt muvəffəğ bıə təğribən 3500 kilomiter çı Ğərəboği ərazi əcumlə 132 kilomiter çı İroni sərhəd nezi məntəğon ozod ko.
