Azərbaycan Respublikaədə de Kərimə Ğıroni unsiyət qətey mərosim.
De Ğədrə şəvi dəme mınosibəti həmzəmon və de Azərbaycan Respublika məşhurə ğarion iştiroki de Kərimə Ğıroni unsiyət qətey mərosimon bərpo bin.
Bə İRİB raporti əsos, həminə mərosimədə ki İroni səforətxonə mədəni baxşədə dəvoniyə be 6 nəfər çı Azərbaycan Respublika məşhurə ğarion iştiroki kardışone.
Azərbaycan Respublikaədə bıə İroni səforətxonə mədəni baxşi mışovir həminə mərosimədə votışe: 100 nəfəriku vey çı Kərimə Ğıroni fəəalon iyən muəlimon həm ın mənəvi iclosədə iştirok kardışeone.
Azərbaycan Respublikaədə bıə vəli-fəği nımoyəndə muavin Huccətul-İslam vəl-muslemin Mirsəlam ın mərosimədə votışe: Xıdo kəlom həmmə zəmononədə yeqanə nure ki mıtləğə zılməti vədəy.
Əv bə bəşəriyəti səmti Kərimə Ğınoni nozil bey yolə neməti işorəş karde və votışe: Əime-Əthor(ə) həmonə hidoyət əkəyonin ki Kərimə Ğıronədə çəvon vucudi barədə işorə bıə.
İştirokədkəyon bə Kərimə Ğıroni təməssuk kardey çı Fələstin milləti xilos bey yeqanə roy elan kardışone.
Mubarək Rujə mo dəme həmzəmon har ruj i cuz Ğıron çı Azərərbaycan Respublika məçidonədə de cıvonə ğarion vositə təlovət beydə.
Xəbə omə Ğədrə şəvi mərosimonədə həm Azərbaycon Respublika mısılmonə millət vey hevujə iştirokışon be.
Bə rəvayəton əsos mubarək rujə manqi 19, 21 və 23-nə şəvon həmonə Ğədrə şəvonku iborəte ki mısılmonon de şəvədə oğo mande, Ğıroni bə sə noe, dıvo hande, Coşən Kəbir nomo məxsusə dıvo ğiroət karde deştə Pərvərdıqori bə raz-niyaz və mınocat karde məşğul bıdən.
Ğədrə şəv qıləy şəve ki 1 sori mıddətədə çəy vədə fəzilətinə şəv peydo nibəbe, anədə ki ım şəvədə ibodət karde bənə 1000 manqədə bıə ibodət ğeyd bıə və həmonə şəvədə insonii təğdir iyən tale mıəyyən bəbe.
