Rujə İdi bəpeş ərzaği ğıyməton ijən boho be.

Rujəmoə manq bə orəx rəse. Xalğ bəştə harrujnə jimoni ğaydəon oqardedə. İ manqnə Rujə ibadəti bə peş xeyzonon bəştə sufrə ləzzətinə təamon dəvoşte pidəşone

Əmo təəssuf ki, bənə har sori ğəzinə ımsorən Az.R vıjoronədə ərzaği ğıymət ıjən boho bıə. “Bizimyol.info” sayt de ım mevzu əlağədar nıvıştedə ki, əhali bənə ərzaği kaqə qujdo vey istifadə kardedə. Bokuədə 1 kilo kaqə qujdi ən erjonə ğıymət  5 mənot 80 kopike. Tavuə molə qujdi 1 kilo 15 mənot, ən erjonə sesəkə ruən bə 18 mənot, pamədor 2 mənot 70 kopikiku tosə 3 mənot 40 kopik, piyoz bə 1 mənot, kərtof 1 mənot 40 kopik, ğənfeti ən erjoni kilo bə 7 mənot, bırzi erjonə ğıymət 5 mənote. Sayti muxbir bə ım vəziyyəti nəzərən əlavə kardedə ki, becizə ailəon ki, minumum məvacib sedən, ıştə Rujəmo bə peşnə quzəroninən bənə Rujəmo dəvunie məcburiyyətədən.

Ponə sori orəxədə Boku hokuməti ğıyməton tənzim karde ro qıley sosialə paket elan kardışe. Çə vaxtiku Respublikadə əksər ərzaği ğıyməton 70-80 %, kali məhsulonki isə  100 faiz ziyod bıə. Hokuməti təşkil kardə İdəvə yarmarkaonən bə vəç omedənin. Çunki əyoən ğıyməton çe market və vıjoron ğıymətondən cəmi 20-30 kopik fərğ dodə.

“Sputnik Azərbaycan” saytən keşvəri aptekonədə kali dəvocaton bə hamsuə devləton nisbətədə de 5-6 ğat bohoə ğıyməti  həvate fakt ğeyd kardəşe. Məlum bıə ki, “BiGaia” nomədə pereparat Turkiyədə de Azərbaycani puli bə 17 mənot, Boku aptekonədə isə bə 121 mənote. Elyar İsmayıloğlu bə muxbiri votəşe ki, Turkiyədə 14 mənotinə dəvo Bokuədə bə 114 mənot, İxtiyar Əsgəroviən ğeyd kardəşe ki, Bokuədə 300 mənot ğıymətinə pereparat Misirədə bə 120 mənot səşe. Şəms Əlisoyən Azərbaycanədə 59 mənotinə dəvo Turkiyədə bə 14 mənot bıe votəşe.

Əmo Respublika vıjoronədə ğıyməton total surətədə an ğədər boho bıe səbəbi barədə nə musahibon, nəən muxbiri hiç qıley mulahizə bə nav doəşon ni.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.